Ekipet turke të shpëtimit e kanë tërhequr të gjallë nga rrënojat një adoleshent, dy ditë pas shembjes së ndërtesës në Stamboll.
Ndërtesa tetëkatëshe u shemb të mërkurën në mbrëmje në Stamboll. Zyrtarët kanë njoftuar se numri i të vdekurve ka arritur në 14, ndërsa mbi 20 të tjerë janë shpallur të zhdukur. Ekipet e emergjencës kanë bërë kërkime edhe gjatë natës për të gjetur persona të mbijetuar.
Djaloshi 16-vjeçar u gjet i gjallë gjatë ditës së premte pasi autoritetet e kishin dëgjuar atë duke kërkuar ndihmë. Gjatë ditës së djeshme, nga këto rrënoja ishte nxjerrë e gjallë edhe një vajzë pesëvjeçare.
“Deri tash, 14 persona janë gjetur të vdekur dhe 14 persona janë nxjerrë të gjallë”, tha ministri i brendshëm turk, Suleyman Soylu, në një konferencë për gazetarë. Banorët e disa ndërtesave përreth ndërtesës së shembur janë zhvendosur për shkaqe të sigurisë, ndërsa autoritetet janë duke e hetuar shkakun e shembjes së ndërtesës, shkruan “BBC”.
