Në minierën e kromit në Bulqizë, dyshohet se gjatë punës janë aksidentuar dy punëtorë: B.M, dhe B.Gj, konfirmuan burime policore.
Të lënduarit, sipas policisë së Bulqizës, po marrin ndihmë mjekësore në spital dhe ndodhen jashtë rrezikut për jetën. Ndërkohë, grupi hetimor po vijon hetimet në vendngjarje, për dokumentimin dhe zbardhjen plotë të rrethanave të ngjarjes.
Më herët gjatë kësaj të premteje, një punëtor gjeti vdekjen teksa ishte duke punuar në minierë. “Në minierën e Bulqizës në zonën D, duke punuar brenda në minierë dyshohet se është shembur një masiv shkëmbori dhe për pasojë ka humbur jetën një 58-vjeçar”, njoftoi zyrtarisht policia.
Të tjera detaje u dhanë nga Ministria e Insfrastukturës dhe Energjisë, që njoftoi edhe nisjen e një kontrolli për zbatimin e kushteve të punës.
“Një ngjarje e rëndë ka ndodhur sot në datë 08.02.2019, rreth orës 10:30 në minierën e subjektit ‘Albmine Chrome’ në Bulqizë, ku si pasojë e një aksidenti ka humbur jetën punonjësi A.A., 58 vjeç. Ai ka qenë duke punuar si vagonist në një nga galeritë e minierës, kur nga tavani është shembur një sasi materiali.
I aksidentuari kishte rreth 2 vjet punë në këtë subjekt minerar dhe ishte i regjistruar dhe i siguruar sipas ligjit.
Me t’u informuar për ngjarjen Autoriteti Kombëtar për Sigurinë dhe Emergjencat në Miniera ka nisur një grup kontrolli, i cili do të verifikojë zbatimin e të gjitha detyrimeve ligjore për masat e sigurisë teknike në punë dhe do të hartojë një raport të plotë lidhur me ngjarjen dhe shkaqet e saj”, njoftoi ministria. /Boldnews.al/
