Duket se 31 maji është një datë e mallkuar për Elvis Rroshin, por edhe për Partinë Socialiste.
Për koinçidencë, në të njëjtën datë të 5 viteve më parë, Elvis Rroshi u bë protagonist i një ngjarjeje që lindi nga hiçi e skandalizoi gjithë vendin, duke bërë edhe kryebashkiakun e tanishëm të Tiranës protagonist.
Më 31 maj të vitit 2011, Elvis Rroshi denonconte rrëmbimin e ish-bashkëshortes së tij Griselda Rroshi.
Sipas dëshmisë, rrëmbyesit e morën atë dhe pasi e keqtrajtuan, gruas që thoshte se ishte shtatzënë iu hoq fëmija. Më pas e lanë para banesës së saj në Kavajë në gjendje të rëndë psikologjike.
Socialistët u alarmuan aq shumë saqë mesnatën e 1 qershorit Erion Veliaj në emër të PS-së i dërgoi një e-mail gjithë ambasadorëve të huaj të akredituar në Tiranë ku shkruante se “gruaja shtatzënë e kryetarit të sapozgjedhur të Bashkisë së Kavajës, Elvis Roshi, u rrëmbye në një qendër tregtare në Tiranë. Pasi është keqtrajtuar barbarisht nga rrëmbyesit, ajo është dërguar në një vend të panjohur, ku i kanë hequr fëmijën…”, shkruante ndër të tjera Veliaj, pa e konfirmuar lajmin.
Pas një hetimi rezultoi se e gjithë historia ishte e pavërtetë, nuk kishte as rrëmbim dhe as shtatëzani. Por çështja u harrua shpejt dhe kryebashkiaku i Kavajës ishte ylli në ngjitje i Rilindjes, deri sot, më 31 maj 2016…/Tirana Observer/
