Nga Boldnews.al
Një nga katër zyrtarët e arrestuar në Ministrinë e Drejtësisë është edhe Aurel Lamçe, i cili ka qenë në poste të larta në Ministrinë e Infrastrukturës dhe Energjitikës kur drejtohej nga Nasip Naço dhe më vonë edhe pjesë e Ministrisë së Drejtësisë, që mbahej po nga LSI.Zyrtarët e arrestuar janë ish-sekretarja e përgjithshme Juliana Hoxha, drejtori ekonomik Aurel Lamce dhe dy specialistët e IT-së, Lysien Ali dhe Arlind Alikaj. Ata akuzohen se në dy vite, 2016-2017, kanë abuzuar me tendera të ndryshëm që janë zhvilluar nga Ministria e Drejtësisë.
Hetimet janë shtrirë për 5 tendera; Mirëmbajtja dhe mbikëqyrja e sistemit ICMIS në 7 Gjykatat Administrative; Përmiresimi i sistemit të mbikëqyrjes elektronike në fushën penale; Përmirësimi, Zhvillimi dhe Mirembajtja e Regjistrit Noterial Shqiptar; Sistemi i Monitorimit me kamera për burgun e Lezhës dhe Fushë Krujës dhe Përmirësimi dhe mirëmbajtja e sistemit elektronik të çështjeve të përmbarimit.
Shkeljet janë evidentuar fillimisht nga grupi i inspektimit të Ministrisë së Drejtësisë, e me pas dhe nga grupi i inspektimit te Ministrisë së Financave, që dosjen ia kaluan për shqyrtim Prokurorisë së Tiranës. Nga hetimi rezultoi se katër të arrestuarit dhe tetë zyrtarë të tjerë që janë në masën e sigurisë “detyrim paraqitje”, kanë abuzuar me tenderat publik dhe do të procedohen për shpërdorim detyre dhe shkelje të barazisë së pjesmarrëve të dendera.
Ajo që vihet re është pikërisht fakti se një nga të ndaluarit, pikërisht Aurel Lamçe ka qenë në disa drejtori të rëndësishme kur drejtohej nga Nasip Naço, që duket se e ka promovuar edhe më shumë, për ta katapultuar më pas në çdo ministri ku shkonte apo kishte influencë. Gjithashtu në profilin e tij në Facebook, Lamçe ka një numër të madh fotosh dhe videosh nga takimet me strukturat drejtuese të Lëvizjes Socialiste për Integrim.
Më herët në një postim në rrjetët sociale reagoi edhe ish-ministri Ylli Manjani që u shpreh se është i gatshëm të hetohet për çdo rast, ndonëse ndihej keq që abuzimi i pretenduar nga prokuroria ka ndodhur në ministrinë që ai drejtoi në bashkëqeverisjen PS-LSI në vitet 2013-2017. Ndërsa deri më tani nuk ka asnjë reagim nga ish-ministri që e “rriti” dhe promovoi drejtorin që sot është i arrestuar për abuzim me tenderat publik.
