Kreu i opozitës, Lulzim Basha ka reaguar pas dorëheqjes së kryebashkiakut të Kavajës, Elvis Rroshi, i cili u bë edhe simbol i kauzës së demokratëve për dekriminalizimin.
Në një deklaratë për mediat, Basha akuzoi kryeministrin Edi Rama se e ka ditur se Rroshi ka pasur dënim në Zvicër për drogë por zgjodhi të mos dëgjonte shqiptarët.
“E dinte edhe kur do ta kandidonte por zgjodhi të mos dëgjonte shqiptarët si tani që doli në mbrojtje. Nuk është një ditë për të fërkuar duart, është një ditë për të parë se ku e ka katandisur Edi Rama Shqipërinë. Ndryshe nga çfarë parashikonin dajrexhinjtë e tij në media, ligji funksionon. Me shprehjen e tij më të dashur: s’ka parë asgjë akoma, ligji do t’i nxjerrë të gjitha”, tha Basha.
Kreu i PD-së, theksoi se problemi nuk zgjidhet me largimin e kryebashkiakut të Kavajës duke kërkuar largimin e kryeministrit Rama.
“Problemi nuk zgjidhet me largimin e Rroshit, ky duhet të largohet, ky që i gënjen dhe poshtëron shqiptarët. Që i ka zhytur në krizë të thellë. Largimi i Edi Ramës është zgjidhja. Ai duhet të mbajë përgjegjësi para shqiptarëve. Ta çlirojmë Shqipërinë nga kjo e keqe që i ka zënë frymën, nga gënjeshtrat nga korrupsioni nga inkriminimi. Kjo është fitore e një beteje por lufta do të vazhdojë”, tha Basha.
