Fondi Monetar ndërkombëtar ka lëshuar kritika të ashpra ndaj administratës tatimore duke e konsideruar atë si një nga pengesat kryesore të ekonomisë. Gjatë një konference të përbashkët për shtyp me ministrin e financave, shefi i FMN në Tiranë, Jens Reinke, deklaroi se tatimet bëjnë represion ndaj biznesit dhe janë selektive.
” Unë mendoj se një nga pengesat kryesore për më shumë optimizëm dhe zgjerim në sektorin privat janë Tatimet. Ketu nuk flas për të ardhurat, të cilat po rriten pas masave të qeverisë. Por mënyra se si Tatimet komunikojnë me sektorin privat ndjehet nga biznesi si ndëshkuese dhe jo koherente. Ky është një problem i rëndësishëm,”- tha Reinke.
Sipas tij, edhe pse treguesit makroekonomik duken pozitiv, biznesi nuk ka të njëtën ndjesi. “Biznesi thotë se administrata tatimore bën represion. Kjo pengon biznesin vendas të zgjerohet dhe investimet e huaja që të vijnë”, tha Reinke.
Burime konfidenciale kanë thënë për SYRI.net se FMN i ka kërkuar qeverisë ndryshime në kupolën më të lartë të administratës tatimore duke përfshirë edhe largimin e drejtoreshës së përgjithshme.
Sipas këtyre burimeve, pranë misionit të FMN kanë mbërritur shumë ankesa nga përfaqësues të sektorit privat për korrupsion dhe selektivitet në kontrollet tatimore, por edhe në funksionet e tjera të kësaj administrate, përfshirë rimbursimin në Tatimit mbi Vlerën e Shtuar.
“Kur unë flas me përfaqësues të biznesit marr përshtypjen se ata nuk janë në humor për të shijuar ndonjë gjë,” – shtoi Reinke.
