Nga Boldnews.al
Kushdo që rriti pritshmëritë se vettingu shfaqi shenja pavarësie dhe udhëhiqej nga kritere rigoroze në vlerësimin e gjyqtarëve dhe prokrorëve, mori zhgënjimin e radhës me konfirmimin në detyrë të kryeprokurores së Krimeve të Rënda Donika Prela. Është vetëm një emër më shumë në statistikat e Komisionit të Pavaruar të Kualifikimit, por ky institucion tregoi se “varet” hapur diku…, që e ka emrin pushtet.
Në seancën e datës 22 janar, u deklaruan nga KPK dhe përfaqësuesi i ONM-së gjetjet hetimore që kompromentonin Prelën në justifikimin e pasurisë. Apartamente dhe troje të blera prej saj dhe bashkëshortit nuk korrespondonin me vlerën reale të tregut. Gjithashtu Prela ishte aq e bindur që do e kalonte vettingun saqë sfidoi deri në përbyzje përfaqësuesin e ONM-së (Operacioni Ndërkombëtar i Monitorimit) Theo Jacobs, kur ky i fundit pyeti se si është e mundur që bashkëshorti i saj ka fshehur të ardhurat dhe nuk ka paguar taksat nga paga si inxhinier ndërtimi.
“Unë e bashkëshorti jetojmë në Shqipëri”, tha ajo, duke lënë të kuptohej se tek ne është normale të mos paguash taksat dhe shkelësh hapur ligjin, edhe nga ata që quhen gardianë të ligjit.
Përfaqësuesi ndërkombëtar tashmë do të duhet të ulë kokën para Prelës, pasi “Pela” e pushtetit e nxorri atë nga lumi. Ndaj zonjës që drejton Krimet e Rënda elita politike drejtuese ka detyrime, pasi ka mundur të mbyllë dosjet e zeza të korrupsionit dhe krimit të organizuar të lidhur me njërëzit e pushtetit. Duke shpëtuar Prelën nga shkarkimi, më shumë se sfidë e hapur ndaj gjithë procesit të vettingut, është krijuar një kauz e rrezikshme, që Gjykata Ndërkombëtare e Strasburgut do e mbajë në konsideratë.
Në sistemin ndërkombëtar të drejtësisë, njihet precedenti juridik dhe ai vlen si kazus për shumë çështje të ngjashme. Rrezikohet seriozisht që një pjesë e gjyqtarëve dhe prokurorëve që nuk janë konfirmuar në detyrë të rikthehen në sistemin e drejtësisë nëse para gjyqësorit ndërkombëtar paraqesin “Precedentin Prela”. Të gjitha ata gjyqtarë dhe prokurorë që janë shkarkuar me motivizn se kanë shmanguar taksat, apo krijuar pasuri duke dhënë çmime fiktive blerjeje, kanë një arsye më shumë për të treguar se ka dy standarte në vlerësimin e kritereve.
Në momentin që do të zbardhet vendimi i arsyetuar nga tre anëtarët e KPK-së Roland Ilia, Valbona Sanxhaktari dhe Olsi Komici, dosja do të jetë publike dhe si e tillë kanë të gjithë të drejtën juridike, por edhe morale që të shkarkuarit ta përdorin “çështjen Prela” si precedent.
Të gjithë në grup, të shkarkuarit mund ta hapin procesin në Gjykatën e Strasburgut dhe të mbrohen denjësisht me rastin e Donika Prelës; duke argumentuar me dy rreshta thelbin: “Ky është rasti që subjekti ka kaluar vettingun, pavarësisht problemeve me deklarimit fiktiv në blerje pronash dhe në mospagimin e taksave nga të ardhurat”. Moralisht KPK ka fundosur veten, duke krijuar përceptimin masiv publik dhe ngulitur pa dyshimin më të vogël të vërtetën e madhe se ky institucion ka varësi për emra të veçantë nga “Pela e Pushtetit” që të nxjerr nga lumi…
