Tetë persona kanë ndërruar jetë dhe rreth 30 të tjerë janë kanë marrë lëndime të rënda nga një zjarr që shpërtheu në një bllok apartamentesh në periferinë jugperëndimore të Parisit e që po trajtohet nga policia si një zjarrvënie e qëllimshme. Agjencia e zjarrëfikëses tha për “AFP” se pritet që bilanci tragjik të thellohet.
Zjarri në dy katet e sipërme të një ndërtese tetë katëshe në jugperëndim të Parisit, jo shumë larg kullës “Eifel” ishte një nga më të rrezikshmit në kryeqytet prej disa vitesh. Sipas “AFP” zjarri nisi rreth orës një të mëngjesit, dhe rreth 200 zjarrëfikës, 3 prej të cilëve mbeten të lënduar, mundën ta vinin nën kontroll vetëm pas 5 orësh pune intensive.
Shkaqet e zjarrit nuk janë verifikuar por prokurori tha se një grua është arrestuar, ndërsa nënkryetari i bashkisë pohoi se mund të jetë një mosmarrëveshje mes fqinjësh.
“Një person është arrestuar, është një grua dhe aktualisht është në paraburgim”, tha prokurori i Parisit Remy Heitz nga vendi i ngjarjes të martën në mëngjes, ku ende mund të shihej tymi.
“Ne do të lejojmë që policia të japë informata të mëtejshme, por një mosmarrëveshje mes fqinjëve është një nga mundësitë që po shqyrtohen nga hetuesit”, tha për radio RTL, nënkryetari i bashkisë Emmanuel Gregoire./Boldnews.al/
