Komisioneri i BE për Zgjerim dhe Fqinjësi të Mirë Johannes Hahn është pyetur nga një deputet grek, në lidhje me përvetësimin sipas tij nga shteti shqiptar, të tokave që i përkasin pakicave greke në vendin tonë. Lajmin e raporton media greke raporton Ekathimerini.
Sipas gazetës greke, Komisioneri Evropian ka thënë të hënën se Komisioni Evropian po monitoron nga afër situatën në të gjithë vendin.
Hahn tha se raporti i Komisionit mbi Shqipërinë në prill 2018 vuri në dukje se vendi ballkanik nuk kishte bërë ndonjë përparim në përmirësimin e kuadrit ligjor në lidhje me ndarjet dhe kompensimet, vijon më tej raportimin Ekathimerini. Johannes Hahn shtoi më tej se Komisioni po shqyrton mundësinë e dhënies së ndihmës financiare dhe teknike për të ndihmuar Shqipërinë që të adresojë çështjen.
Tokat që u bënë mollë sherri
Një vendim i Këshillit të Ministrave në nëntor 2018 për kalimin në pronësi të Ministrisë së Turizmit të disa pronave në vijën bregdetare Vlorë-Sarandë, ka sjellë përplasje diplomatike mes Shqipërisë e Greqisë.
Athina zyrtare pretendon se tokat janë pronë private, i përkasin anëtarëve të pakicës kombëtare greke dhe e quan vendimin e qeverisë shqiptare arbitrar.
Ndërkohë, Tirana zyrtare shprehet se pala helene “mbështetet në shtrembërim të fakteve” dhe se pronat më fjalë gëzojnë statusin e pronës shtetërore.
Edhe në VKM-në e 21 nëntorit, e publikuar në Fletoren Zyrtare më 4 Dhjetor, sqarohet se pronat që i kalojnë në administrim Ministrisë së Turizmit, janë prona shtetërore. /Boldnews.al/
