Albana Vokshi, deputete e PD-së, ka mirëpritur dhe mbështetur kërkesën e pedagogëve të Universitetit të Tiranës, për çeljen e një debati lidhur me ligjin për Arsimin e Lartë.
“Në cilësinë e Kryetares së Komisionit për Edukimin dhe Median e mirëpres dhe e mbështes plotësisht kërkesën e asamblesë së pedagogëve të Universitetit të Tiranës për të çelur një debat në Komision për ligjin e arsimit të lartë.
Në përgjigje të kësaj kërkese Komisioni për Edukimin dhe Median do të mblidhet nesër në orën 10.00 për të diskutuar mbi këtë kërkesë, dhe caktuar orën e ditën e zhvillimit të mbledhjes me pedagogët”, thuhet në një reagim të deputetes Vokshi.
