Nga Boldnews.al
Kreu i Lëvizjes Vetëvendosja në Kosovë mbështet grevën e studentëve në Tiranë, duke e konsideruar të drejtë protestën e tyre dhe njëkohësisht lëshuar sinjalin se politikat e ndjekura nga Rama po çojnë vendin drejt katastrofave. I pranishëm në Fakultetin e Shkencave Sociale ku krahas studentëve ka nisur edhe protesta e pedagogëve, Albin Kurti doli në mbështetje të tyre.
“Në Kosovë kemi ndjekur protestat tuaja. Protesta e studentëve është e drejtë kur pedagogët janë me ta. Arsimimi duhet të jetë falas, për luksin paguhet, kurse arsimi nuk është luks. Protesta e studentëve është protestë kundër privilegjeve që ekzistojnë për biznesmenët”-deklaroi kreu i Vetëvendosjes.
Me tej kishte edhe një mesazh për kryeministrin Rama, që sipas tij ka monopolizuar gjithçka. “Studentët kanë reaguar ndaj padrejtësive në arsim. Politika te ne është arti i keq, në Shqipëri është monopolizuar gjithçka, dhe humori. Studentët nuk janë e ardhmja, rinia është e tashmja jonë”-shtoi Kurti.
Më shumë se një reagim normal i politikanëve shqiptarë në Prishtinë apo Tiranë, kundrejt një proteste studentore, qëndrimet e Vetëvendosjes janë edhe më të thella, ku kryeministri Edi Rama, në Prishtinë po konsiderohet çdo ditë e më shumë si ideaotori i projektit që synon ndarjen e Kosovës, duke i kaluar Serbisë Veriun e Mitrovicës dhe mjaftuar me një pjesë të Luginës së Preshëvës që mund t’i bashkangjitet Kosovës.
Kjo është edhe ideja e Hashim Thaçit, që bashkarisht po shtrojnë shinat e një marrëveshjeje të re, fundi i së cilës nuk dihet si do përfundojë, çka mund të sjellë pasoja të rënda në të gjithë Ballkanin Perëndimor dhe më gjerë. Ndonëse Ramës i pëlqen ta quajnë një “Lider Global”, mënyra si po qeveris vendin dhe politikan ndërkombëtare që po ndjek po shkojnë drejt një qëllimi që synon “korrigjimin e kufijve” Kosovë-Serbi, projekt që ka vite që qarkullon në “Loshën Sorosiane”, ku Rama ka vendin e tij në projektet okulte.
Kryeministri Edi Rama në Kosovë është krejtësisht i anatemuar, për më shumë që e gjithë klasa politike, me përjashtim të presidentit Thaçi, është deklaruar haptas kundër ndryshimit të kufijve. Loja e rrezikshme që Rama po gatuan u pa edhe në javët e fundit, me dhënian e kompetencave të Ministrit për Europën dhe Punët e Jashtme Gent Cakajt, 28-vjeçarit nga Kosova i dërguar me “postë të shpejtë” në Tiranë nga dyshja Hashim Thaçi dhe Baton Haxhiu.
Qëndrimet e ministrit të deleguar Cakaj janë të qarta pro korrigjimit të kufijve, ndonëse i duhet të ketë përballë “diplomat karriere” të vendeve të BE-së që në grup janë kundër çdo forme të ndryshimit të kufijve. Edhe mbërritja në Tiranë e Kurtit më shumë se një mbështetje të protestës studentore është sinjali i qartë se janë kundër politikave që po ndjek Rama në lidhje me çështjen e Kosovës.
