Autoritetet italiane janë vënë në alarm pasi një 35-vjeçar shqiptar tentoi të vriste gruan e tij dhe dy djemtë me hanxhar. Ai bërtiste dhe kërcënonte dhe më pas ka shkatërruar edhe derën e banjës ku ishte fshehur gruaja 33-vjeçare me 2 fëmijët e mitur. Shqiptari u arrestua për dhunë në familje ndaj gruas dhe dy fëmijëve të mitur, rrëmbim personi si edhe për tentativë vrasje dhe kërcënim ndaj efektivëve të policisë.
Ngjarja ka ndodhur pasditen e së shtunës kur policia morri njoftimin nga fqinjët e familjes se po ndodhte një sherr në banesë. Policia ka nisur menjëherë negociatat me shqiptarin duke i thënë të arsyetojë dhe të mos lëndojë familjarët e tij.
Por 35-vjeçari është kundërpërgjigjur duke kërcënuar agjentët me një hanxhar të madhe kuzhine, e madje duke tentuar disa herë t’i godasë ata.
Ndërkohë, gruaja një 33-vjeçare me origjinë italiane dhe dy fëmijët e vegjël, janë fshehur në tualet, duke shkaktuar një reagim të dhunshëm dhe të çmendur te bashkëshortit të saj, i cili i armatosur me një thikë dhe çekiç, ka hyrë në dhomë dhe ka tentuar ta vrasë gruan.
Duke parë rrezikun për jetën e gruas dhe të fëmijëve, policia ka hyrë në banesë nga dera e përparme e shtëpisë e më tej nga dritarja e banjës. Policia ka neutralizuar menjëherë shqiptarin duke i hequr armën e ftohtë.
Sipas mediave italiane, për të neutralizuar situatën kanë ndërhyrë edhe patrulla të tjera shtetërore të policisë, forcat zjarrfikëse, policia shkencore dhe karabinierët. Ata kanë bërë negociata të gjata me shqiptarin i cili donte të qëllonte familjen e tij, gruan dhe dy djemtë e mitur.
Gruaja dhe fëmijët u vunë menjëherë nën kujdesin e mjekëve, pasi kishin kaluar në gjendje shoku. Për fat të mirë asnjë nga familja nuk mbeti i lënduar. Vetëm disa policë që ndërhynë për të neutralizuar 35-vjeçarin u plagosën lehtë. Nga hetimet rezultoi se shqiptari kishte precedentë të mëparshëm penal.
