Nga Boldnews.al
Komisioneri i Vetingut, Olsi Komici, ka votuar në korrik 2018 për shkarkimin e prokurorit të Korçës, Elsion Sadiku, pasi ky i fundit nuk justifikonte me burime zyrtare të ardhurat e bashkëshortes së tij.
Komisioneri Komici dhe anëtarët e tjerë të trupës gjykuese në rastin “Sadiku” nuk e kanë konsideruar të vlefshme një dokument, lëshuar nga ish-punëdhënësi i bashkëshortes së prokurorit, i cili deklaronte se e kishte paguar zonjën me një pagë më të lartë se sa ishte deklaruar në administratën fiskale.
Komisioneri Komici është përballë të njëjtës situatë me drejtuesen e Prokurorisë për Krime të Rënda, Donika Prela, e cila nuk justifikon me burime zyrtare të ardhura disa-vjeçare të bashkëshortit të saj, Vangjel Prela.
Në seancës dëgjimore para Komisionit të Vetingut, Donika Prela u mundua të justifikohej se të ardhurat e bashkëshortit të saj janë të mjaftueshme për të rritur pasurinë e familjes. Por, pas konstatimeve të vëzhguesit ndërkombëtar, Theo Jacobs, për mungesën e pagimit të taksave nga Vangjel Prela për një periudhë thuajse 4-vjeçare, prokurorja u rrek të justifikohet se faji ishte i kompanisë “Bruci” shpk, e cila kishte abuzuar me ligjin dhe nuk kishte paguar detyrimet fiskale për bashkëshortin e saj.
Ky debat tregoi qartësisht se Vangjel Prela nuk rezulton të ketë qenë i punësuar zyrtarisht. E, në këto kushte, të ardhurat e tij janë të paligjshme dhe nuk mund të konsiderohen si burim zyrtar për krijimin e pasurisë së familjes Prela.
Për të shpëtuar nga ky “siklet”, Donika Prela ka nxitur ish-punëdhënësin e bashkëshortit të saj, kompaninë “Bruci” për të bërë një deklaratë drejtuar Komisionit të Pavarur të Kualifikimit, në të cilën administratori i kompanisë pranon se ai ka pasur të punësuar Vangjel Prelën.
Gjithashtu, familja Prela ka paditur në Gjykatën civile të Tiranës kompaninë “Bruci” shpk, me objekt njohjen e viteve të punës dhe pagesën e sigurimeve shoqërore dhe shëndetësore për periudhën e padeklaruar.
Të dyja këto tentativa, si në aspektin ligjor, ashtu edhe në praktikën e Komisionit të Vetingut, janë të dështuara. Në çdo rast, rezulton se Vangjel Prela nuk justifikon me burime të ligjshme të ardhurat e tij, pjesa më e madhe e të cilave janë përdorur për shtimin e pasurisë së familjes së drejtueses së Krimeve të Rënda.
Këtë standart ka mbajtur komisioneri Olsi Komici në rastin e prokurorit të Korçës, Elsion Sadiku. Në vendimin nr. 50, dt. 27.07.2018, Komisioni i Vetingut, ndër të tjera, deklaron për prokurorin Elsion Sadiku:
“Pavarësisht provave dhe sqarimeve të dhëna nga subjekti i rivlerësimit, si: deklarata noteriale e pronarit të klinikës dentare “(***)” dhe të dy klientëve të saj, listës së klientëve të klinikës dentare, fotokopje e librezës së punës së bashkëshortes, sqarimeve të pyetësorëve, etj., konfirmohet fakti se nuk rezulton e provuar me asnjë dokumentacion ligjor, si dhe nga asnjë institucion shtetëror apo privat, që bashkëshortja e subjektit të rivlerësimit, znj. M. S., të ketë qenë e punësuar, punësim për të cilin të ketë paguar detyrimet tatimore, para datës 01.07.2009 e, për rrjedhojë, të ketë përfituar pagesa përpara kësaj date”.
Pra, komisioneri Komici, si edhe dy kolegët e tij, rezulton që e kanë konsideruar “nul” deklaratën e ish-punëdhënësit të bashkëshortes së prokurorit Elsion Sadiku. Tashmë, duhet parë nëse komisioneri do të përsëris të njëjtin qëndrim përballë “deklaratës” së “Bruci” shpk., i cili konfirmon se ka pasur të punësuar Vangjel Prelën edhe në atë periudhë të gjatë kohore, kur për bashkëshortin e Donika Prelës nuk rezulton asnjë dokument zyrtar që të vërtetojë këtë pretendim.
Olsi Komici ishte zv.Drejtor i Përgjithshëm i ALUIZNI-t, strukturë nën varësinë e qeverisë para se ai të fitonte pozicionin anëtarit të Komisionit të Pavarur të Kualifikimit. Më parë, emri i tij ishte ndër 9 personat, të cilët morën firmën e Kryeministrit Edi Rama për të qenë pjesë e Task-Forces që do të shqyrtonte rregullsinë e titujve të pronësisë në bregdet, një strukturë e drejtuar nga Alket Hyseni, aktualisht deputet i Partisë Socialiste.
