Nga Boldnews.al
Prokuroria e Përgjithshme njoftoi se është nisur një hetim penal për nxjerrje të sekretit hetimor, në vijim të publikimit të disa përgjimeve nga dosja “339” e Krimeve të Rënda, por pa dhënë asnjë informacion nëse ka nisur ndonjë hetim zyrtar për personat me pushtet publik që janë regjistruar në komunikime me anëtarë të bandës kriminale “Avdulaj”.
“Zëri i Amerikës”, në dy investigime në pak javë, i fundit u publikua të Mërkurën e kësaj jave, ka publikuar dokumenta zyrtarë nga dosja “339”, në përgjimet e së cilës gjenden emrat e politikanëve shumë të lartë të maxhorancës socialiste. Përgjimet e para u publikuan rreth një muaj më parë, në të cilat, ashtu si edhe në investigimin e dytë, kishin të dhëna mbi komunikimet e kryebashkiakut të Durrësit, Vangjush Dako, me eksponentë të botës së nëndheshme të Shijakut.
Gjithashtu, përgjimet e publikuara kanë nxjerrë edhe përfshirjen e deputetëve, përfshirë edhe Kryetarin e Komisionit të Ligjeve, Ulsi Manja, duke kërkuar favore të paligjshme për punësimin e militantëve apo personave të tjerë në administratën e Burgjeve.
Nga ana e Prokurorisë së Përgjithshme dhe asaj të Krimeve të Rënda, e cila po ndjek dosjen “339” nuk është bërë asnjë njoftim publik nëse ka nisur ndonjë procedurë hetimore mbi emrat e politikanëve të përfshirë.
Rreth dy muaj më parë, kur në media u publikuan përgjimet e para ndërmjet Dakos dhe Avdulajve, Prokuroria e Përgjithshme deklaroi se do të verifikoheshin të dhënat e publikuara për të vlerësuar nëse ka vend për hetim. Ky deklarim ishte absurd në aspektin ligjor dhe institucional.
Përgjimet e publikuara përfshijnë një periudhë kohore nga shkurti 20017 deri në maj 2018. Deri në Tetor 2018, kur u realizua operacioni “Vol-Vo 4”, ato konsideroheshin “sekret hetimor” dhe, me të drejtë, Prokuroria ka vlerësuar që të mos veprojë ndaj zyrtarëve, për të mos dekonspiruar hetimin mbi grupet kriminale që komunikonin me njerëzit me pushtet.
Por, pas arrestimit të anëtarëve të grupeve kriminale, Prokuroria nuk ka pasur asnjë pengesë për të marrë në pyetje dhe për të nisur hetime mbi zyrtarët e lartë të maxhorancës. Por, prej më shumë se 4 muajsh, Prokuroria për Krime të Rënda as nuk pyetur dhe, për më tepër, as nuk ka nisur asnjë hetim për njerëzit e veshur me pushtet, ku më i larti i dalë deri më tani është Ulsi Manja, kreu i Komisionit Parlamentar të Ligjeve.
Ulsi Manja është njeriu që është investuar më shumë për emërimin e Arta Markut në postin e Kryeprokurores së Përkohshme. Manja ka qenë mbi Arta Markun, në hierarki, në kohën që kanë bashkëpunuar në Prokurorinë e Shkodrës.
Gjithashtu, edhe Donika Prela, drejtuesja e Krimeve të Rënda, është gjithashtu mikeshë e Arta Markut, por edhe e deputetes së rëndësishme të Komisionit të Ligjeve, Ermonela Felaj.
Por, pavarësisht se dosja “339” ka shumë emra zyrtarësh, të cilët nuk heton, Prokuroria ka vendosur të hetojë për nxjerrjen e “sekreteve hetimore”, të cilat, në fakt, nuk kanë bërë gjë tjetër, vetëm se kanë nxjerrë në dritë atë që institucioni i Prokurorisë nuk po arrin ta zbardhë për shkak të paaftësisë ose, me shumë mundësi, për shkak të presioneve politike.
