Deputetja e PD dhe njëherazio kryetare e Komisionit Parlamentar të Medias akuzon ministren e Arsimit, Besa Shahini se po i fshihet përgjegjësisë që i ngarkon ligji. Edhe pse ka qenë e ftuar nga ky komision në seancë dëgjimore në orën 15:00, Besa Shahini ka refuzuar ftesën e deputetëve. Albana Vokshi ngre shqetësimin se zhvendosja e studentëve të Juridikut në ambientet e gjimnazit “Petro Nini Luarasi”, rrezikon sigurinë e nxënësve atje. Për këto çështje, shton Vokshi, ishte ftuar ministrja të raportonte, por injoroi llogaridhënien përpara komisionit të Kuvendit duke iu fshehur përgjegjësisë që i ngarkon detyra.
Denoncimi i Vokshit
BRAKTISJA E KOMISIONIT NGA MINISTRJA SHAHINI DHE SIGURIA E FËMIJËVE NË SHKOLLA
Ministrja e Arsimit Besa Shahini refuzoi të paraqitet në Komisionin Parlamentar të Edukimit në dëgjesën e thirrur nga Deputetët e opozitës në orën 15.00, për kërkesat e studentëve dhe problematikat e Ligjit të Arsimit të Lartë.
Ministrja e Arsimit Besa Shahini, edhe në mëngjes, refuzoi t’u përgjigjej pyetjeve të deputetëve të opozitës.
Madje, në një veprim të paprecedent, ajo u largua nga Komisioni në mënyrë demonstrative, në momentin që unë ngrita shqetësimin për rrezikun e sigurisë së fëmijëve në gjimnazin Petro Nini Luarasi, pas vendimit të Ministres për transferimin e kurseve të studentëve të juridikut atje. E konsideroj këtë një eksperiment tepër të rrezikshëm, pasi fëmijët adoleshentë, veçanërisht vajzat, mund të mos jenë të sigurt në të njëjtin ambjent me studentë të rritur.
I bëj thirrje të gjithë #prindërve të reagojnë për një vendim që vë në rrezik sigurinë e fëmijëve të tyre. Fëmijët Janë Të Parët”, shkruan Vokshi.
