Në deklatarën e pasurisë në ILDKP, gjyqtari i Elbasanit, Qani Hasa ka shkruajtur të ardhurat e tij: 60 dele, 27 dhi dhe dy lopë, në një fshat të Librazhdit.
Gjyqtari është pjesëtar i një familje bujqësore, dhe ai deklaron 400 000 lekë të ardhura për vitin 2015 nga ky aktivitet.
Hasa deklaron gjithashtu edhe 75 milionë lekë cash, një shumë kjo e pazakontë. Megjithatë, ai thotë se paratë burojnë nga shitja e pasurisë “njësi” të bashkëshortes, nga paga si gjyqtar, nga aktiviteti i bashkëshortes si notere si dhe nga tërheqja nga llogaria e saj.
Gjyqtari deklaron gjithashtu 300 000 lekë të ardhura nga qiraja e një banese në Tiranë, 3 600 euro të ardhura nga qiraja e një banese dhe garazhi në Sauk të Tiranës, 1 524 757 lekë të ardhura nga aktiviteti i privat i bashkëshortes si notere në Elbasan etj, shkruan Shqiptarja.com.
Petrit Aliaj
Gjyqtari Petrit Aliaj deklaron pagën e vajzës së tij në SHBA, vetëm për një vit kalendarik, mbi 133 mijë USD. Ai thotë se ka dhënë me qira një lokal në Tiranë, me afat 12 muaj, për 24 650 lekë. Gjyqtari Aliaj deklaron se ka shpenzuar 900 000 lekë për pajisje mobilierie dhe elektroshtëpiake për dy apartamente familjare. Bashkëshortja e tij, Kozeta Aliaj ka depozituar në një bankë në Gjirokastër, 2 000 000 lekë.
Vetë Aliaj ka depozituar 3 000 000 lekë në një bankë në Sarandë, ndërsa deklaron 300 000 lekë gjendje cash në shtëpi, të hequr mënjanë gjatë viteve. Vajza tjetër e tij vazhdon studimet në shkollën e mesme, në Durrës. Për ndjekjen e kësaj shkolle ka paguar 3 mijë euro për një vit shkollor. Ndërkaq, ILDKP, pas kontrollit të subjektit në fjalë, ka konstatuar fshehje të pasurive, deklarime të rreme të interesave private, falsifikime dokumentesh, transferta të dyshimta dhe pa burime të ligjshme financiare jashtë vendit.
