Partia Demokratike, dega Peqin ka organizuar një protestë ku në duar mbanin pankarta “Ndal terrorit në Peqin” për të kundërshtuar sipas saj dhunën e ushtruar nga deputeti Aqif Rakipi.
Kryetari i PD-së Peqin, Diell Çela gjatë fjalës së tij sqaroi incidentin që kishte patur me me deputetin e PDIU Aqif Rakipin.
“Nuk i heq asnjë pikë deklaratës së Sekretarit të Përgjithshëm të PD-së se një incident i tillë nuk duhej të kishte ndodhur por kjo tregon vertikalizimin e dhunës nga qendra në bazë” – shprehet Çela.
Pak ditë më parë Partia Demokratike akuzoi deputetin e PDIU, në mazhorancë, Aqif Rakipi, se kishte rrahur barbarisht kryetarin lokal të PD në Peqin Diell Çela. I dhunuari pranoi dhunën, por nuk bëri denoncim.
Të pranishëm në protestë ishin edhe deputetët Luçiano Boçi dhe Fatbardh Kadili të cilët prekën problemin e papunësisë dhe mosmbajtjen e premtimeve nga Bashkia e Peqinit.
