Seanca parlamentare ka nisur ditën e sotme me disa shqetësime që ka ngritur deputeti i PS-së Eduart Shalsi. Ai ka shprehur shqetësimin e tij se nuk po zbatohet rregullorja e Parlamentit pasi seanca zhvillohet në çështje jashtë rendit të ditës.
“Duke vërejtur me shumë keqardhje që po bëhet gjithnjë e më i shpeshtë fakti që ndërsa në rendin e ditës kemi projektligje të caktuara, në seanca parlamentare flitet për gjithçka tjetër përveçse projektligjeve në fjalë”, ankohet deputeti socialist. Për këtë deputeti Shalsi deklaroi se i kishte çuar një letër kryetarit të Kuvendit për këtë problem dhe sipas tij po kthehen në shqetësim diskutimet jashtë rendit të ditës dhe gjuha e papërshtatshme.
Kreu i Kuvendit, Ilir Meta ishte dakord me Shalsin.
Por, nga ana tjetër, kreu i deputetëve të opozitës, Edi Paloka tha se nuk mund të flitet për projektligjet shpërthejnë çdo ditë.
“Nuk mund të flitet për projektligjin e ushqyerjes me gji, në një kohë kur shpërthejnë skandale si ai i arratisjes së të kërkuarve për trafik droge apo ai i Shukri Xhelilit,” tha Paloka.
Ndërkohë çështja e Xhelilit ka ngacmuar fantazinë e artistit Bujar Kapexhiu, që vjen me punimin e mëposhtëm:
“Kemi rënë në një batak, diskutojmë për gjithçka por jo vetëm për ligjet. Nuk është serioze dhe normale të flitet për çështje që nuk janë në rendin e ditës”, tha Shalsi.
“Kuvendi është i vetmi vend ku kemi të drejtën e fjalës, si të flasim për ligjin e ushqyerjes me gji kur kemi pamjet e Shukriut në TV, po kur shohim skandale? Këtu skandalet zënë njëri-tjetrin. Ju propozoni të mos i përmendim këto. E drejta e deputetëve për të folur në Kuvend është e padiskutueshme” replikoi Paloka.
Ndërsa ministri i Mjedisit Lefter Koka u shpreh: Me këtë adrenalinë pranverore ku dominon dekriminalizimi, reforma në drejtësi, hashashi dhe së fundmi Shukriu, të flasësh për ketrin dhe ariun duket sikur nuk je në vendin e duhur.
