Sot është përuruar Qendra Kombëtare Dispeçer dhe e Sistemit të ri të Kontrollit nga Operatori i Sistemit të Transmetimit (OST).
Në këtë përurim ka qenë i pranishëm edhe kryeministri Edi Rama, i cili tha se është krenar që “Shqipëria ka një qendër dispeçer të këtyre standardeve”.
“Në rrugën e reformave, po i kthejmë publikut atë çfarë po investojnë. Kemi hyrë në sistemin europian të monitorimit, shkëmbimit të energjisë. Ky sistem i jep fund shpërdorimit të energjisë elektrike”, theksoi Rama.
Ndërsa administratori i OST-së, Engjëll Zeqo theksoi se “qeveria ka treguar vëmendje të veçantë për sektorin e energjisë”.
“Kjo është Qendra Dispeçer ndër më modernet në Europë. Realizimi i këtij projekti ka qenë i rëndësishëm për sistemin tonë”, deklaroi Zeqo.
Damian Gjiknuri, ministër i Energjisë, u shpreh: “Kjo është një nga veprat më të rëndësishme energjetike. Shqipëria është e integruar tashmë në rrjetin energjetik europian dhe investitorë të mëdhenj po afrohen falë reformave të mëdha”.
