Prej vitit 2011 Jahmir Hyka nuk ka luajtur më në kampionatin shqiptar, duke luajtur për 7 sezone tek Luzern në Zvicër dhe duke shkuar në pas në Amerikë, për dy sezone.
Aventura tek San Jose Earthquake mori fund në vjeshtë dhe prej shtatorit mesfushori shkatshkurtër është pa ekip e pa ndeshje zyrtare.
Në moshën 30-vjeçare, Hyka duhet të bëjë disa llogari dhe të mendojë për të ardhmen, sepse është në një moment ku i duhet stabilitet, në fushë dhe në financa. Për këtë arsye, prej javësh ka pritur për ndonjë ofertë serioze nga jashtë Shqipërisë, në një kohë që vijon të stërvitet te Tirana, që është shtëpia e tij e dytë.
Natyrisht, në janar klubet nuk shpenzojnë me shumë qejf, pasi nuk duan të ndryshojnë totalisht balancat e ekipeve, ndaj edhe Hyka mund të presë qetësisht verën, për të gjetur një ekip ku ta nisë fazën përgatitore të plotë.
Për këtë arsye, po bëhet gjithnjë e më konkrete mundësia e firmës me Tiranën, duke imituar Elis Bakajn, i cili vjet luajti disa muaj në Shkodër, pas mbylljes së aventurës së shkurtër me Splitin. Edhe Bakaj do të firmoste për Tiranën, por klubi bardheblu ishte dënuar dhe nuk mund të federonte askënd në janar, ndaj erdhi transferimi në Shkodër.
Trajneri Ardian Mema foli në lidhje me merkaton të premten, në një intervistë për Supersport, ku në një farë mënyre e dha një sinjal për Hykën: “Marrja e një apo dy lojtari nuk do të ishte keq, sepse nuk mund të vendosim në emergjencë. Më mirë të qëndrojmë kështu siç jemi sesa të nxitohemi dhe të bëjmë gabime që do na kushtojnë më vonë, në kosto dhe në shumë gjëra. Në një bisedë që kam pasur me presidentin kemi diskutuar se na duhet një lojtar që të ketë një lloj performance, a ka mundësi të jetë edhe lojtar i ekipit Kombëtar? Në të kundërt i kam thënë se nuk jam i interesuar për lojtarë të tjerë që të jenë anonimë”. Të gjitha rrugët çojnë te Hyka, lojtari që do i zgjidhte jo pak halle Tiranës, përveçse do ishte një goditje fantastike edhe për imazhin e rrënuar të klubit bardheblu.
