“Do ju zhvarros të gjithëve. Do ju vras fëmijët”. Kështu deklaron vjehrra e Adriatik Jellës, i cili mbeti i vrarë pas një konflikti të ashër me familjen e gruas së tij. Ngjarja e rëndë ndodhi në Topojan të Bulqizës, ku përveç 40-vjeçarit, u plagosën rëndë 2 persona të tjerë.
Fidane Cidhnaku, në një intervistë për ‘News24’, tregoi detaje nga ngjarja në fjalë, që nisi me plagosjen e djalit të saj, plagosjen e krushkut të saj dhe më pas vrasjen e dhëndrit. Vjehrra e viktimës tha se gjithçka kishte nisur pasi dhëndri i kishte plagosur djalin, pas kërcënimeve të vazhdueshme që u bënte atyre pasi ishte ndarë nga gruaja.
Ajo tha se pak pasi Adriatiku kishte plagosur kunatin, ishte nisur drejt shtëpisë së tyre dhe më pas kishte plagosur vëllain e nuses së saj. E moshuara tha se me dru 40-vjeçarin e kishin qëlluar dy vëllezërit e nuses së djalit të saj. Po ashtu ajo shtoi se Jella i kishte kërcënuar me jetë të gjithë si familje, madje edhe me akte më ekstreme, deri tek përdhunimi i grave të familjes.
Kryeplaku: Si nisi sherri me familjen e gruas
Ndërkohë, kryeplaku i fshatit Topojan, Vedi Shehu, tregon se si ndodhi krimi në familje.
Po ashtu ai pohon se gjithçka kishte nisur 3-4 muaj më parë kur viktima, Adriatik Jella, rreth 40 vjeç, ishte ndarë nga gruaja dhe kjo e fundit ishte shpërngulur tek babai i saj, Veli Cidhnaku.
NGJARJA
Gjithçka nisi një ditë më parë kur pas një sherri për motive të dobëta Adriatik Jella, i preu veshët vëllait të bashkëshortes. Ngjarja ndodhi në Maqellarë të Dibrës. Mësohet se Jella u nis drejt fshatit të gruas së tij, Topojan, dhe sapo hyri në banesë, plagosi një prej miqve të kësaj familje (vëllai i një prej nuseve të familjes Cidhnaku). Duke u gjendur në këto rrethana, thuhet se vjehrri i tij ka marrë një dru dhe e ka goditur në kokë dhëndrin.
Intervista me kryeplakun e fshatit
Si ka ndodhur ngjarja?
Ngjarja ka ndodhur rreth orës 18:00 të mbrëmjes së djeshme ka shkuar Jella në shtëpinë e vjehrrit, viktima, dhe ju ka bërë terror. Dhe në fund është ndeshur me Flamur Dervishin dhe e ka qëlluar me thikë në qafë dhe dy herë në brinjë. Flamuri është mik i kësaj familje. Në spital në Tiranë janë dy persona. Policia erdhi në vendin e ngjarjes dhe e mori agresorin, po ai ndërroi jetë.
Cili ishte motivi i sherrit?
Viktima e kishte lënë bashkëshorten prej 3 muajsh. Me të ka dhe dy fëmijë dhe kishin probleme. Ky thuhet se ka kërkuar që ta marrë gruan dhe ata se kanë lënë. Ndaj për këtë arsye kanë ndodhur ngjarjet, ku ai ngeli viktimë dhe dy të plagosur janë rëndë në Tiranë.
Viktimën e kanë goditur me dru pas koke?
Kështu flitet, unë nuk e kam parë.
Kanë qenë edhe dy fëmijët brenda kur ka ndodhur krimi?
Po, po kanë qenë në shtëpi. Ata janë terrorizuar edhe ata. Kanë qenë shumë madje aty, pasi i zoti i shtëpisë ka 4 djem. Ka pasur fëmijë dhe gra në atë shtëpi. Janë tronditur të gjithë nga kjo ngjarje. Kjo është një histori e hershme, pasi ata kishin konflikte prej 3-4 muajsh. Ata kishin dy fëmijë, një vajzë dhe një djalë (vajza në klasë të parë dhe djali më i vogël). Ata kanë pasur konflikte.
