Nuk kemi nevojë as që shteti të bëjë një ligj për portalet dhe as që qeveria të fusë duart aty ku nuk i takon. Kështu është shprehu Kryetari i Këshillit Shqiptar të Medias, Koloreto Cukali, teksa flet për draftin e ri të qeverisë për mediat online. Ai tha se, ka një ligj që funksionon për shpifjen dhe ajo zbatohet në gjykatat shqiptare.
“Shpifja dënohet në ligjin civil shqiptar me gjobë. Kushdo që ankohet në gjykatë, e merr të drejtën. Ne nuk kemi nevojë për rregullim ligjor, por për etikë në media. Por, kjo etikë nuk zgjidhet me ligje dhe ndërhyrje nga qeveria”,deklaroi Cukali në studion e “Top Talk”. Më tej, ai e konsideroi nismën e qeverisë si censurë, duke e grisur në studio projektligjin.
“Ky është akt i pastër terrorizmi politik. Nëse ky ligj kalon, na çon përtej Turqisë, vend ku ka shkelje të drejtave të njeriut dhe lirisë së shtypit. Ky ligj i jep mundësinë një individi me pushtet që të mbyllë çdo faqe brenda 24 orësh për një vit. Ti mund ta gjesh të drejtën në gjykatë vetëm pas 4 vitesh. Është ligj regresiv në frymën e vet, zgjidhja është vetërregullimi. Ky draft griset dhe hidhet, pasi nuk është draft evropian, por kinez. Nuk duhet të vijë qeveria që të mbyllë portalet, është një proces që i lihet vetë gazetarëve në dorë, të cilët gradualisht do të mblidhen për të bërë vetërregullimin, siç është Urdhri i Mjekut. Ligji hidhet në plehra, më pas nis procesi i vetërregullimit, ku qeveria mund të ndihmojë me mënyrat e saj, por jo përmes ligjesh që bëhen apostafat për të mbyllur mediat online”, u shpreh Cukali.
