Ditën e djeshme për pesë orë me radhë socialistët zhvilluan mbledhjen e tyre të Kryesisë, që sipas analistit Mero Baze është një rikthim te politika.
Kur të gjithë prisnin që kryeministri Edi Rama të përmendte ndonjë emër për të larguar nga qeveria e tij, kjo nuk ndodhi, edhe pse në daljen e tij për gazetarët pas mbledhjen numri 1 i qeverisë e la të hapur mundësinë e ndërrimit të ministrave.
Sipas Bazes Rama ka maninë që të jetë një kryeministër i paparashikueshëm, prandaj edhe dje nuk patëm asnjë zhvillim të këtij lloji.
Duke u ndalur më tej te performanca e ministrave, analisti thotë se disa prej tyre kanë marrë superpushtet dhe janë shkëputur tërësisht nga vetë PS-ja, edhe pse partia i ka mundësuar që të jenë në pozita të tilla.
‘’Pas pesë vitesh pushtet, në PS ka fare pa produkte politike, përjashto kryebashkiakun e Tiranës që ja shton vlerën politike PS dhe ndonjë ministri që nuk ja ul vlerën. Të tjerët punojnë me kapital të marrë hua në PS dhe nuk e kthejnë kurrë kredinë që marrin”, shkruan mes të tjerave Baze.
Reagimi i plotë i Bazes:
Sot edhe mund të kishim disa ministra të ndryshuar dhe riformatim qeverie, sikur këtë gjë, të mos ja kërkonin Edi Ramës me aq ngulm, shumica e opinionistëve, apo sikur të mos I bënte fakt të kryer opozita.
Nëse ka një gjë që Edi Rama nuk e ka ndryshuar nga dita e parë e ardhjes në pushtet, është mania që lajmet ti kumtoj ai dhe jo të jetë një kryeministër I parashikueshëm. Kjo ndoshta nuk është arsyjea e vetme pse sot ai nuk bëri asgjë, por dhe vetëm kjo arsye do të mjaftotne që të mos bënte ndryshimet sot.
Por sot ka bërë disa gjëra që kishte harruar ti bënte prej kohësh.
Së pari më në fund u bë një mbledhje kryesie e socialistëve ku ata u mblodhën për të dëgjuar njëri tjetrin dhe jo vetëm fjalimin e kryetarit. Kjo nuk kishte ndodhur prej vitesh, ose më mire të themi, prej momentit kur pushteti mendon se partia e kreu funksionin e saj pasi na dha pushtetin dhe tani është radha e vendimeve nga pushteti.
Në fakt e vetmja garanci që një qeveri të jetë më e ndjeshme, më pak arrogante, më pak e korruptuar dhe mbi të gjitha më e përgjegjshme, është të jetë një qeveri politike.
Dhe kur them politike nuk kam parasysh njerëz që hyjnë në politikë, pasi bëhen ministra por që njerëz që kanë identitet politik të bëhen ministra.
Ata janë shumë më të përgjegjshëm dhe të ndjeshëm ndaj sinjaleve që vijnë nga elektorati, sa dikush që nuk ka bërë kurrë një fushatë elektorale, por e ka filluar karrierën politike si ministër.
Një qeveri mund të ketë luskin të ketë dhe ndonjë ministër të tillë, por shumë të tillë dhe vetëm ndonjë për shenjë politik, është realisht problem.
Dhe kur të ndodhin kriza të tilla që në thelb janë kriza moskomunikimi politik, që vijnë prej mos marrjes në kohë të sinjaleve nga shoqëria, ministrat politikë janë kuaj shumë më të mire beteje.
Së dyti ka shumë rëndësi që socialistët të thellojnë debatin brenda tyre mbi ndryshimet e mundëshme në qeverisje, që të mos bëjnë ndryshime bazuar në emra, por ndryshime bazuar në një qeveri funksionale. Stuktura e qeverisë së re “Rama 2” duhet pranuar që vrau qeverinë funksionale, mbifuqizoi ministra që ndoshta as vet nuk e duan gjithë atë pushtet, krijoi ministri formale që nuk I duhen askujt dhe humbi disa identitete ministrish që janë historike. Është mirë që ndryshimi të rifilloj nga stuktura, por natyrisht jo me ndonjë qilizëm të madhe që të rihumbas sërisht dhe gjashtë muaj, të mësojnë zyrat.
Së treti që është dhe më e rëndësishme, ministrat e rinj apo drejtuesit e rinj të PS, mund të jenë suprizë e publikut, por duhet të hiqet zakoni që të jenë dhe suprizë e PS dhe vet ministrave. Është mirë që drejt emrave apo strukturave të rej atë shkohet përmes një debati real .
Pas pes vitesh pushtet, në PS ka fare pa produkte politike, përjashto kryebashkiakun e Tiranës që ja shton vlerën politike PS dhe ndonjë ministri që nuk ja ul vlerën. Të tjerët punojnë me kapital të marrë hua në PS dhe nuk e kthejnë kurrë kredinë që marrin.
Qeverisja dhe kabineti nuk është vetëm eksperiment për të prodhuar administrator, por mbi të gjitha për të formuar identitete politikanësh, pasi vetëm ata janë jetgjatë në politikë. Të tjerët vijnë, marrin, ikin dhe pasaj bëhen opinionist ose kryetar OJQ. Është mirë që kjo praktikë të marrë fund duke bërë një analizë reale se kush ka marrë kredi politike nga PS dhe sa I ka kthyer asaj mbrapsht. Është I vetmi parametër që mund të shpall suksesin apo falimentimin e tyre.
Pas gjithë kësaj Edi Rama le ta ruaj të drejtën të na i thotë ai lajmet, por lajmet e vërteta nuk janë ato të orës së pare, kur i njofton ai por të kohës kur të shikojmë nëse zgjedhjet e reja, ruajnë traditën e vjetër, apo janë një rikthim me këmbë në tokë.
