Projekti i ‘Unazës së Re’ në Tiranë, përveç debatit të shpronësimeve, ka tërhequr vëmendje të madhe edhe për shkak se kosto për ndërtimin e një kilometër autostradë do të kushtojë 20 milionë euro.
Por këtë rekord e ka thyer së fundmi një tjetër projekt, ai i autostradës Thumanë-Kashar.
‘Monitor’ raporton se në buxhetin 2019, qeveria deklaroi si kosto buxhetore për aksin Thumanë-Kashar shumën prej 45.5 miliardë lekë, ndërsa Ministri i Financave, Arben Ahmetaj, ka njoftuar në Kuvend se kosto totale buxhetore e këtij projekti është 56.3 miliardë lekë (440 mln euro) ose 22 % më e lartë se programi buxhetor.
Aksi Thumanë -Kashar shtrihet në 20 kilometra dhe sipas vlerës së fundit që ka raportuar Ministri Ahmetaj kosto për kilometër arrin në mbi 22 milionë për kilometër me një kosto totale 440 milionë euro.
“Kostoja buxhetore totale e parashikuar është 56.3 miliardë lekë. Kosto buxhetore mesatare ndër vite, në 13 vite, është 4.3 miliardë lekë. Ky është investim i menjëhershëm, duke futur në tregun vendas më shumë likuiditet, mundësi për vende të reja pune, e përmenda aksin” është shprehur Ministri i Financave Arben Ahmetaj, sipas procesverbalit të zbardhur të Kuvendit.
Thumanë-Kashar u përfshi në 13 projektet prioritare të strategjisë sektoriale të transportin për periudhën 2016-2020. Dokumenti që ka marrë miratimin e qeverisë parashikonte fillimisht një kosto 92 milionë euro për 20 kilometrat , por tani dy vite më vonë nga strategji në fuqi qeveria shqiptare e kontraktoi segmentin për ndërtimin nëpërmjet koncesionit me PPP kundrejt 220 milionë eurove, teksa kosto totale sipas variantit të fundit të paraqitur nga ministri në Kuvend shkon 440 milionë euro ose 22 mln euro për kilometër. Koncesionin e fitoi kompaninë Gener 2 pasi dha ofertën më të ulët, raporton Monitor.
