Armando Sulejmani kishte vetëm pak kohë që kishte dalë nga burgu pasi ishte dënuar me 20 vite heqje lirie për vrasje, vjedhje me dhunë dhe krijim të bandave kriminale.
40 -vjeçari që u plagos mbrëmë në një antetat në Vlorë është një prej anëtarëve të bandës së Gazmend Brakës, të njohur me emrin Gaxhai, i dënuar me burg përjetë.
Sulejmani ndryshe njihej me nofkën “Çipuri”.
Mbrëmë, rreth orës 21.30, dy persona të maskuar e qëlluan duke dalë nga pallati në lagjen “Pavarësia”, nën shoqërinë e një personi tjetër. Ai u shmang, u ngjit në apartament, mori një pistoletë dhe nisi të qëllojë në drejtim të atentatorëve.
Ka shkëmbyer zjarr me ta dhe sipas disa dëshmitarëve, njëri prej tyre është plagosur, pasi është parë duke çaluar.
14 gëzhoja plumbash pistolete u gjetën në vendin e ngjarjes.
Armando Sulejmani u dënua me 20 vjet burg në vitin 2003 nga gjykata e Vlorës për vrasjen e Elton Tatos dhe vrasje të mbetur në tentativë të Robert Borakut.
Atentati i ditës së djeshme dyshohet të jetë i lidhur me këto ngjarje.
Në vitin 2012 çështja e tij u kthye për rishqyrtim nga Gjykata e Lartë, me arsyetimin se e njëjta gjyqtare që kishte vendosur në Gjykatën e Apelit në vitin 2003 kishte qenë pjesë e trupit gjykues që kishte vlerësuar masën e sigurisë.
