Studiuesi Taulant Muka prej ditësh është duke mbështetur protestën e studentëve, e cila ka hyrë në ditën e 11-të. Por, teksa këta të fundit vazhdojnë me këmbëngulje të refuzojnë dialogun, Muka në një prononcim për Tirana Today sfidon drejtuesit e partive politike, si edhe deputetë të bëjnë publike diplomat e tyre.
Sipas tij, ministri i Bujqësisë Niko Peleshi është diplomuar 13 vjet pasi ka nisur universitetin, pra në të njëjtën kohë kur i hyri politikës.
“Çdo qytetar duhet të vijë dhe të mbështesë rininë shqiptare, sepse ajo është e ardhmja. Dhe duhet të vijë për kauzën e arsimit. Për të zbuluar politikanë që nuk kanë diploma. Unë e kam sfiduar publikisht edhe kryeministrin Rama të nxjerrë diplomën dhe doktoraturën e vetë.
Po ashtu sfidoj kryetarin e opozitës Lulzim Basha të publikojë diplomën. Për sa kohë flas jam shumë i sigurt në ato që them. Le të më hedhin në gjyq, nuk e kam frikë fare. Monika Kryemadhin e treguam që kishte plagjiaturë, po lëre dhe kryetarin e Bashkisë, Erion Veliaj. Në ka diplomë apo i ka certifikata kursesh ato që nxjerr.
Është ministri i Bujqësisë, Niko Peleshi i cili në CV shkruan që ka mbaruar gjimnazin në ’89 dhe në po të njëjtin vit filloi universitetin e më pas është diplomuar në 2003. Të lutem shumë, ku jetojmë?! Nuk jetojmë në një botë gënjeshtër. Unë kam informacionet e mija informale që kam bërë kërkime dhe i sfidoj që të vërtetojnë që kanë diploma.”- tha Muka.
