Studentët vijojnë të sfidojnë të ftohtin dhe reshjet e shiut para godinës së Kryeministrisë. Ata sot kanë hyrë në ditën e dhjetë me radhë duke kërkuar me ngulm plotësimin e pikave të adresuara me shkresë zyrtare tek kryeministria.
Siç shprehen vetë studentët, nuk do të ketë asnjë dialog dhe negociata me shefin e ekzekutivit pa i plotësuar më parë të 8 pikat.
Gjatë ditës së nesërme është theksuar se protesta e studentëve do të jetë mbarëkombëtare dhe për këtë, mësohen disa skenarë të mundshëm se ku mund të protestohet dhe si do të jetë numri i tyre.
Boldnews.al mëson se studentët do mblidhen nga të gjitha fakultetet dhe më pas do marshojnë në drejtim të Kryeministrisë. Protestës në Bulevardin qendror të kryeqytetit, krahas studentëve, pritet t’i bashkohen mijëra qytetarë.
