Protesta e studentëve është padyshim një nga më të bukurat dhe më masivet që vendi ynë ka pasur. Në ditën e shtatë të kësaj proteste pjesëmarrja duket të jetë e jashtëzakonshme, ndërsa ka ndeshur në një sensibilizim mjaft të madh dhe nga ana e qytetarëve.
Ka pasur plot risi kjo protestë, ashtu siç janë plot ngjyra dhe shpirtrat e të rinjve. Studentët e Akademisë së Arteve kanë vendosur që protestën e tyre ta nisin me himnin kombëtar, studentët e Gjeologji Minierave kanë dalë me kapelet e verdha, ndërsa marshuesit kanë kaluar sot dhe përpara kryeministrisë.
Ndërkohë risitë nuk kanë munguar dhe nga Shkodra, ku të rinjtë kanë akuzuar dhe opozitën për shkak se sipas tyre ka pranuar në heshtje Reformën në Arsim. Nga ana tjetër protesta në ndryshim nga ditët e para ka gjetur përkrahje mjaft të madhe dhe në Gjirokastër.
