Nga Boldnews.al
Gjimnazistët e Tiranës kanë vendosur t’i bashkohen ditën e nëserme protestës së studentëve, duke i dhënë edhe më shumë hov reagimit të të rinjve. Gjithçka është vendosur sot dhe mësohet se gjimnazistët po përgatiten që të bojkotojnë mësimin dhe në orën 10.00 të gjenden në krah të studentëve.
Prania e tyre është mirëpritur nga studentët protestues që sot kanë bërë thirrje që tu bashkohen edhe gjimnazistët e Tiranës.
Nxënësit e shkollave të mesme të kryeqytetit do të mbidhen pranë Ministrisë së Drejtësisë dhe pretendohet që mund të jenë rreth 2000 pjesëmarrës. Ndërkohë, në Gjimnazin Qemal Stafa dhe Ismail Qemali presioni i stafit pedagogjik mbi maturantët ka qenë i madh. Janë dërguar disa sms nxënësve duke i lajmëruar se “nesër ka provim” apo kërcënuar me ulje note apo mungesa. Nuk dihet nëse këto dy gjimnaze do t’i bashkohen ose jo protestës, por tashmë situata ka kaluar në duart e “të rinjve”.
Ky organizim po tentohet që të prishet nga stafi pedagogjik i gjimnazeve dhe eksponentë të tjerë të lidhur ngushtësisht me politikën dhe administratën shtetërore, që po u bëjnë presin gjimnazistëve që të mos dalin në protestë. Kjo frymë ka qenë edhe në universitetet e rretheve që akuzuan se u është bërë presion, ku përveç “bosëve” të politikës lokale janë kërcënuar edhe nga një pjesë të pedagogëve që të mos dalin në protestë.
Megjithë trysninë dhe frikën që po mbillet në gjimnazet e Tiranës të dhënat tregojnë se ata do të braktisin mësimin për të nisur protestën. Edhe pse nuk “preken” drejtëpërdrejtë dhe nuk janë pjesë e tetë pikat që kërkojnë studentët, pjesa më e madhe e gjimnazistëve shprehen se do protestojnë për të ardhmen e tyre, pasi do të jenë ata në të ardhmen në auditorët e fakulteteve.
Fryma e krijuar i ka dhënë shpresë edhe qytetarëve që pasditen e djeshme nisën protestat në Shkodër dhe Kavajë ku kërkuan uljen e çmimit të naftës. Për disa orë bllokuan akset kryesore të rrugës ndërsa situata po përshkallëzohet edhe më shumë nga revoltat.
