Qëndrimi me dy fytyra i Qeverisë përballë rezistencës në rritje të studentëve

Nga Boldnews.al

Qeveria shfaq një qëndrim me dy fytyra teksa protesta e studentëve rritet në numër protestuesish dhe në përhapje.

Një ditë më parë, në fillim Nikolla e më pas Rama, për gjysmën e kërkesave të studentëve të cilët vijojnë protestën, ia kaluan përgjegjësitë universiteteve.

Ajo që thanë të dy në mënyrë të përmbledhur, për 2 prej kërkesave kryesore, ishte se tarifat nuk i vendoste Qeveria e as Ministria e Arsimit, por universitetet, si dhe do propozohet që pika 4 e VKM-së që detyron studentët të paguajnë shtesë për provime të mbartura, ti kalojë si tagër universiteteve për vlerësim dhe të jenë ekipet drejtuese të tyre që të vendosin nëse duhet të hiqet ajo jo.

Ditën e stome, me gjasë të trembur nga protesta masive në Tiranë, si dhe shtrirja e saj në rrethe, qeveria ka bërë një hap prapa lidhur me një prej kërkesat e studentëve, e cilësuar abuzive edhe nga shumë akademikë. Ministrja e Arsimit dhe Sportit Lindita Nikolla, mesditën e sotme, njoftoi se qeveria do të tërhiqet duke anuluar nenin 4 të Vendimit të Qeverisë nr. 288 për tarifën shtesë për provimet e mbartura për studentët.

Megjithatë, studentët janë shprehur se nuk tërhiqen nga protestat derisa të plotësohen të gjitha kushtet e tyre.

Kërkesat e studentëve

1. Anulimi i pikës 4 të vendimit nr. 288 të majit të 2018 për tarifat për kreditet për lëndët e mbartura
2. Përgjysmimi i tarifës së studimit
3. Përmirësimi i kushteve të konvikteve
4. Bordi i Administrimit të ketë numër të barabartë votash mes fakulteteve dhe Ministrisë së Arsimit, duke shtuar një përfaqësues nga studentët në bord.