Ditën e sotme një pjesë e banorëve të Astirit kanë mbërritur në Gjykatën e Tiranës, pasi një prej të arrestuarve do të njihet me masën e sigurisë.
Është fjala për Kujtim Yllin, seanca për të cilin do të nisë rreth orës 11:00. Ai u arrestua dy ditë më parë nga ana e policisë, nën akuzën e prishjes së pronës publike, pasi sipas tyre hoqi blloqet e betonit e vendosur nga firma private që ka fituar tenderin e Unazës së Madhe.
Ylli, i cili ndodhet në një moshë mbi të 60-tat, u shoqërua me forcë nga ana e policisë, edhe pse ai nuk ishte i vetmi që mori pjesë në protestë, dhe s’mund të rrëzonte i vetëm blloqet e betonit.
Nga ana tjetër IMT ka vazhduar gjatë natës së sotme prerjen e pemëve të mbetura në zonën e Astirit, ku duket se shumë shpejt do ti vijë radha dhe shembjes së banesave, për të cilat po rezistohet aq shumë nga ana e qytetarëve.
