Banorët e Zejmenit në Lezhë dhe fshatrave përreth thonë se po e kalojnë shumicën e kohës në errësirë. Ndërprerjet e energjisë elektrike janë kthyer në një problem mjaft shqetësues në këtë zonë.
Banorët thonë se kjo u ka vështirësuar jetesën, pasi kanë familjarë të sëmurë dhe nuk mund ta kalojnë natën me dritën e qiririt.
“Vijnë 2-3 orë, priten dhe nuk vijnë më. Ne pleq, burrë e grua jemi, pa drita, me qiri“, thotë një banor. Edhe pse janë pagues të rregullt të faturave të energjisë elektrike, por investimet në rrjet kanë munguar.
“Ne jemi të rregullt në pagesa. Nuk jemi në Siri, shkatërrim rruge, shkatërrim energjie”, shprehet një tjetër.
OSHEE bën me dije se ndërprerjet e energjisë elektrike vijnë si shkak i rrjetit të amortizuar, por me investimin që ka nisur do ti jepet zgjidhje problematikës.
