Nga Boldnews.al
Gazetari Ylli Rakipi, në një reagim kundër kryeministrit, risolli në kujtesë të opinionit publik një prej ngjarjeve më të rënda të ndodhura në vitin 2002, kur për shkak të paaftësisë, por jo vetëm, të bashkisë së drejtuar nga Edi Rama, u përmbyt një pjesë e madhe e Tiranës së Re, për shkak të hapjes së digës së liqenit artificial.
Ylli Rakipi, i cili në atë kohë drejtonte gazetën “Albania” tregon se si e kishte telefonuar Edi Rama dhe, në ngashërim e sipër, i kërkonte ta ndihmonte në aspektin mediatik. Rakipi dëshmon në një video të publikuar mbrëmjen e së Premtes se ai e ka mbështetur kryebashkiakun e atëhershëm, sot kryeministri, duke vendosur si kryeartikull të gazetës se faji për përmbytjen e Tiranës ishte një gabim i rojes së digës, Ilir Lulja (Liri i Bales).
“Boldnews.al” iu rikthyer kësaj ngjarjeje, e cila, e parë nga largësia e kohës, dëshmon se përmbytja nuk ishte thjesht një gabim njerëzor. Edi Rama, i cili edhe në atë kohë kishte aftësinë të kontrollonte median, ia ngarkoi përgjegjësinë ndërtuesit egjiptian Mohammed El Sayed, i cili kishte ndërtuar një kompleks pallatesh në atë zonë. Sipas deklaratave të Ramës në atë kohë, El Sayed kishte ndërtuar mbi kolektorët e shkarkimit, duke i bllokuar këta të fundit. Ky ishte shkaku, sipas kryebashkiakut të atëhershëm, që uji i tepërt i liqenit nuk u kanalizua drejt Lanës, por përmbyti qindra banesa dhe dyqane në Tiranën e Re.
Në fakt, hetimet e zhvilluara nga Prokuroria e Tiranës në atë kohë provuan se përmbytja nuk kishte ardhur aspak nga bllokimi i kolektorëve, por për shkak të keqmenaxhimit bashkiak. Gjithësesi, kur kjo e vërtetë u zbulua, Edi Rama kishte shpëtuar nga andrallat politike dhe juridike që mund t’i sillte ajo ngjarje.
Në kronikën e kohës është raportuar se për përmbytjen e Tiranës së Re nga hapja e digës së liqenit, u “dorëhoq” nënkryetari i Bashkisë, si edhe u arrestuan disa persona. Sot,15 vjet pas asaj ngjarjeje, një pjesë e tyre vijojnë të jenë pranë pushtetit të Edi Ramës
Blendi Gonxhe, njeriu më i afërt i Edi Ramës në Bashkinë e Tiranës, u detyrua të jepte dorëheqjen, në një tentativë për t’i shpëtuar prangosjes dhe përgjegjësive penale për ngjarjen e rëndë. Më pas, Gonxhe u riciklua në postet e pushtetit të Edi Ramës. Prej vitit 2015, kohë kur Erion Veliaj mori drejtimin e bashkisë së kryeqytetit, Gonxhja u emërua në postin e Drejtorit të Parqeve dhe Rekreacionit. Me firmë të tij u betonizua një pjesë e parkut të Liqenit, i cili momentalisht është kënd lojërash për fëmijë, por që pritet t’i hapë rrugë ndërtimit të një kompleksi pallatesh.
Afrim Qendro, i cili në atë kohë mbante postin e Drejtorit të Ndërmarrjes së Gjelbërimit nr.1 në Tiranë, u arrestua me urdhër të prokurorisë, i dyshuar si një prej përgjegjësve kryesorë të përmbytjes. Në përfundim të gjykimit ai u shpall i pafajshëm nga gjykata, pavarësisht se prokuroria kërkoi 3 vite burgim.
Sot, Afrim Qendro po drejton operacionin për prishjen e shtëpivë në Unazën e Re, nga posti i Drejtorit të Përgjithshëm të Autoritetit Rrugor Shqiptar (ARRSH). Qendro mbante postin e nëndrejtorit të ARRSH deri në fillim të vitit 2018, kur u emërua në krye të institucionit pas arrestimit të paraardhësit të tij, Dashamir Xhika. Ish-drejtori Xhika u prangos për abuzimet në rrugën Tiranë-Elbasan, për të cilat, një pjesë e përgjegjësive i takonin edhe Afrim Qendros. Por, prokuroria e drejtuar nga Kryeprokurorja e Përkohshme, Arta Marku, nuk e përfshiu mikun e kryeministrit, Afrim Qendro, në listën e personave nën hetim.
Ndër të arrestuarit për përmbytjen e Tiranës në vitin 2002 ishte edhe inxhinjer Fisnik Vathi, në atë kohë përfaqësues i kompanisë “Triss”. Në përfundim të gjykimit, edhe inxhinjer Vathi rezultoi i pafajshëm. Sot, ai është pjesë e kompanisë “Star Tek”, e cila, në faqen zyrtare të internetit të saj, ka të publikuar si projekt të realizuar prej saj “rikonstruksionin e Pazarit të Ri” në Tiranë.
Ky rikonstruksion është një prej punëve më të propaganduara të kryebashkiakut Erion Veliaj, i cili nuk lë t’i shpëtojë asnjë rast pa e reklamuar. Madje, në kronikat e gatshme televizive të përgatitura nga stafi i “Lali Erit”, Pazari i Ri trajtohet pak a shumë njëlloj si sheshet e mirënjohura “Duomo” në Milano apo “Piazza di Spagna” në Romë. Kushdo që ka pasur mundësi të shohë këto sheshe të mrekullueshme italiane, e kupton shumë qartë se sa butaforik është “Lali Eri”.
I vetmi që u dënua për përmbytjen e Tiranës së Re nga hapja e digës së liqenit ishte vetëm roja i digës, Ilir Lulja, ose Liri i Bales, për të cilin gjykata vendosi 6 muaj burgim, në vitin 2004.
