Kryedemokrati Lulzim Basha ka akuzuar hapur kryeministrin Edi Rama, për të cilin deklaroi prere se është autori i vjedhjes te “Unaza e Re” përmes megaaferës 40 mln euro.
Thirrje Basha kishte edhe për ndërkombëtarët të cilët tha ai, po heshtin përpara kësaj megavjedhje.
“Ku jeni, për çfarë pune paguheni, për cfarë jeni për të bërë pasarela, për të ngrënë e pirë në restorante të shtrenjta, për të na treguar sa e mirë është vera shqiptare, ja e keni një kryeministër hajdut dhe harbut dhe po rreh fëmijë dhe gra për të vjedhur”.
Sipas tij, Rama po mashtron me shpresën se do t’ja hedhë pa u lagur.
“Afera e Unazës së madhe është vjedhje direkte nga Rama. Gjithçka është negociuar nga Rama, vjedhja e Unazës së madhe përbëhet nga dy komponentë, rrëmbimi i taksave dhe i pronave të 1 mijë familjeve, 317 pronave që do të prishen në kundërshtim me ligjin. 2 mijë euro për centimetër të këtij aksi prej 2 km, imagjinoni, çmimin me të cilin Rama po vjedh paratë e taksapaguesve. Skema e tenderimit është korruptive, pa garë, projekt i pakërkuar, Arrsh më pas gjoja hapi tender dhe u futën tre operatorë, secili me ofertë maksimale, operatori i katërt janë vëllezërit Hysa. Njëri nga tre operatorët i regjistruar në parajsa fiskale ka qenë nën sekuestro”- tha Basha.
