Nga Boldnews.al
Ditën që Sandër Lleshaj priste të merrte detyrën e ministrit të Brendshëm, ai ndërmori një veprim absurd dhe të “denjë” për të treguar se më shumë se sa ministër i shqiptarëve, ai do të jetë në funksion të Partisë që e emëroi në atë detyrë.
Lleshaj bëri një paradë politike në Spitalin e Traumës në Tiranë, ku takoi policët e lënduar gjatë protestës së banorëve të Unazës së Re, e zhvilluar paraditen e së Enjtes para Parlamentit. Por Lleshaj nuk denjoi, as edhe në aspektin njerëzor, të interesohej për shëndetin e protestuesve, të cilët u goditën barbarisht nga punonjësit e Policisë.
Ministri i ri i Brendshëm u soll si një “pronar” që interesohet për punonjësit e tij-policët në këtë rast-por as nuk vizitoi dhe, aq më tepër, as nuk përcolli mesazhe për të qetësuar situatën.
Nga e Enjtja, ish-gjenerali tashmë është politikan. Por, si politikan riosh, nuk arriti të kuptonte se detyra e tij është të interesohet edhe për shëndetin e qytetarëve, të cilët, në të drejtën e tyre, protestuan kundër qeverisë dhe maxhorancës socialiste, në mbrojtje të pronës që rrezikon të shkatërrohet nga projekti abuziv i Unazës së Madhe.
Nisur vetëm nga ky veprim jo-human dhe anti-zyrtar i Sandër Lleshaj, kuptohet lehtësisht se si do të vijojë detyra e tij në krye të Ministrisë së Brendshme. Ai do të urdhërojë arrestimin e kujtdo që do të guxojë të kundërshtojë “të vërtetën e kulluar” të qeverisë së Edi Ramës.
Sandër Lleshaj, me shumë mundësi, do të bëhet “barrikadë njerëzore” për liderin e tij shpirtëror, pavarësisht se, që në ditën e parë dështoi me sukses të ruante integritetin fizik të Edi Ramës.
Kryeministri, vetëm për shkak të fatit, nuk mundi të ndjente shijen e një këpuce në fytyrë, lëshuar nga një qytetar, i cili reagoi në këtë mënyrë kundër pranisë së Edi Ramës në Spitalin e Traumës.
Pasi dështoi në tentativën e tij, qytetari ndjeu menjëherë prangat e policisë, e cila tashmë ka një drejtues të ri politik, i cili duket shumë herë më i përulur para Ramës, krahasuar me paraardhësin e tij, Fatmir Xhafaj.
Ndaj kushdo shqiptar e partner ndërkombëtar që shpreson se Ministri i ri i Brendshëm do të punojë për të mirën e qytetarëve, duke luftuar krimin e organizuar dhe lidhjet e tij me pishtetin, thjesht do të zhgënjehet shumë shpejt.
Sandër Lleshaj dëshmoi sot, vetëm me një vizitë në Spitalin e Traumës, se ai do të jetë në shërbim të qeverisë dhe interesave të pushtetit. Qytetarët? Ata t’ia dalin vetë!
