Për 2 vepra të rënda penale ka nisur procedimi ndaj Veliajt pas protestës që bashkia mbajti të mërkurën para Gjykatës Administrative të Apelit.
Prokuroria deklaron se ka nisur hetimet dhe ka sekuestruar pamjet filmike të protestës së thirrur nga kryebashkiaku Erion Veliaj. Regjistrimi i veprës penale është bërë për “Organizim të manifestimit të paligjshëm’ dhe ‘Kanosje e fyerje ndaj gjyqtarëve’.
Bashkia e Tiranës protestoi më 11 maj para gjykatës Administrative të Apelit, duke kërkuar ndryshimin e gjykatësve të çështjes për pallatet tek Diga e Liqenit, ku ndërtuesit kanë paditur INUK për pezullimin e punimeve për ndërtimin e pallateve.
Për shkak të protestës seanca gjyqësore u shty dhe gjyqtarja Alkelina Gazidede dha dorëheqjen nga çështja.
Veliaj deklaroi se trupa gjykuese kishte lidhje familjare me ndërtuesit dhe kërkoi ndryshimin e saj. Një ditë më parë edhe Kreu i Shtetit, Bujar Nishani paditi Veliajn për shpifje ndaj tij.
