Kryeministri i Kosovës Ramush Haradinaj ka bërë të ditur se qeveria e Kosovës nga sot ka marrë vendim që të vendoset masa prej 100% ndaj produkteve të importuara me origjinë nga Serbia dhe Bosnja e Hercegovina.
Ky vendim i qeverisë së Kosovës vjen pas ofensivës së ashpër serbe në arenën ndërkombëtare për pengimin e Kosovës për tu bërë pjesë e INTERPOL-it.
Kosova vetëm para disa ditës njoftoi vendosjen e një takes prej 10% për produktet serbe, çfarë shkaktoi reagime në Beograd por edhe nga BE. 10-fishimi i kësaj takes pritet të shkaktojë sërish reagime të forta.
Postimi i Haradinajt:
Nga sot masë 100% ndaj Serbisë!
Qeveria e Kosovës në mbledhjen e sotme, ka marrë vendim që të vendoset masa prej 100% ndaj produkteve të importuara me origjinë nga Serbia dhe Bosnja e Hercegovina, përjashtuar brendet ndërkombëtare të listuara në aneks. Poashtu, Qeveria e vendit obligon Ministrinë e Tregtisë dhe të Industrisë dhe të gjitha institucionet relevante, që të largojnë dhe të ndalojnë importin dhe hyrjen potenciale në treg të të gjitha produkteve, të cilat nuk i referohen dhe janë në kundërshtim me emërtimin zyrtar dhe kushtetues të Republikës së Kosovës. Vendimi hyn në fuqi menjëherë – institucionet relevante obligohen ta zbatojnë poashtu menjëherë.
