Gjykata e Apelit ka vendosur “burg pa afat” për Ervis Martinaj, duke ndryshuar në këtë mënyrë vendimin e gjykatës së shkallës së parë, e cila kishte vendosur “burg me afat 30 ditë”. Ervis Martinaj mbeti i plagosur në një konflikt të ndodhur në fillim të Tetorit në një lokal në qendër të ish-Bllokut.
Prokuroria e Tiranës kishte apeluar masën e sigurimit me afat, duke e mbështetur pretendimin e saj në disa prova, të cilat u vunë në dyshim nga gjykata e shkallës së parë. Sipas prokurorisë, ajo ka siguruar të dhëna, në bazë të të cilave rezulton se Martinaj ka thirrur nëpërmjet telefonit miqtë e tij, pak para se të zhvillohej konflikti me një grup tjetër, pjesë e të cilit ishte edhe i dashuri i këngëtares Elvana Gjata, Ervin Mata.
Po ashtu, prokuroria pretendon se në duart e Ervis Martinajt, pas ngjarjes, i janë gjetur gjurmë baruti, duke argumentuar se ai është përfshirë në mënyrë aktive në konfliktin e armatosur. Këto prova të prokurorisë u rrëzuan nga gjykata e shkallës së parë. Sipas gjyqtarit të çështjes, rezultonte se prokuroria nuk kishte analizuar telefonin e Martinajt. Gjithashtu, gjykata konstatoi se, po sipas aktit të ekspertimit të dorëzuar nga vetë Prokuroria, në duart e Martinajt nuk rezultonte të kishte gjurmë faktorësh plotësues-baruti.
Pasi analizoi këto prova, gjykata e shkallës së parë rrëzoi kërkesën e Prokurorisë, duke caktuar masë me afat 30 ditë, në mënyrë për t’i lënë kohë Akuzës që të sillte prova të reja. Prokuroria e Tiranës e apeloi vendimin e gjykatës, ndërkohë që gjatë kësaj periudhe i ka atribuuar atij edhe disa akuza të tjera, që lidhen me “pastrimin e parave”.
Gjykata e Apelit, paraditen e së Hënës, vendosi që Ervis Martinaj të qëndrojë në masën e sigurisë “arrest me burg” pa afat. Vendimi nuk është zbardhur dhe ende nuk është e qartë nëse Apeli ka bërë një vlerësim të ndryshëm të provave të paraqitura më parë nga Prokuroria apo ka ashpërsuar masën, për shkak se prokurorët kanë shtuar volumin e akuzave ndaj Martinajt.
Mbrëmjen e 4 Tetorit, pas një konflikti fillimisht fizik e më tej me armë, mbeti i vdekur Fabiol Gaxha, si edhe të plagosur Ervis Martinaj dhe Elion Hato. Për këtë ngjarje janë shpallur në kërkim disa persona, mes të cilëve edhe ish-komandoja Mevjol Bilo, i cili dyshohet se është personi që ka qëlluar me armë ndaj viktimës dhe dy personave të dëmtuar.
