Godina e njësisë administrative të Kolshit në Lezhë dhe dy biznese aty pranë u rrezikuan nga një zjarr që përfshiu zonën pranë rrugës nacionale Lezhë-Milot.
Flakët i shfaqën rreth mesnatës dhe të favorizuar edhe nga era u përhapën me shpejtësi në një sipërfaqe të konsiderueshme me shkurre.
Forcave zjarrfikesë dhe banorë të zonës iu deshën me shumë se 2 orë punë për të vënë nën kontroll zjarrin, që sipas të dhënave të para dyshohet se ishte i qëllimshëm.
Ndërkohë Forcat e Armatosura janë angazhuar për të shuar zjarret që vijojnë prej gati 10 ditësh në në Parkun Kombëtar Shebenik-Jabllanicë.
Vatra më e fundit është shfaqur në vendin e quajtur “Zgavra e Zezë”, ndërkohë që pak ditë më parë po në këtë zonë në vendin e quajtur “Përroi i Peshkut” pjesë përbërëse e Parkut Kombëtar “Shebenik-Jabllanicë” u dogjën shtatë ha me pyje ahu.
Ndërsa një vatër tjetër zjarri ka përfshirë një masiv pyjor jo shumë larg kësaj zone.
Vatra zjarri në prag të dimrit janë shfaqur edhe në Bulqizë, ku janë djegur mbi 12 hektarë sipërfaqe me pyje në njësinë e administrative Zerqan.
