Ministrja e Kulturës Mirela Kumbaro pak ditë më parë i çuditi të gjithë me postimin e saj në Twitter, ku përdorte një shprehje me pullë të kuqe, në mënyrë që të tërhiqte sa më shumë vëmendje për leximin e librave.
Postimi i Kumbaros ishte një shprehje e shkrimtarit të njohur John Waters, të cilin vetë ministrja nuk përmendte në asnjë rresht.
E ftuar këtë mëngjes në emisionin “Wake up”, Kumbaro i është rikthyer sërish këtij debati kur u pyet nëse ky status ishte i qëllimshëm, ose jo.
“Unë kam marrë citimin e shkrimtarit të njohur John Waters, është copy-paste. Virale bëhen dëshirat negative, jo mesazhet pozitive”, tha ministrja.
“Gjithsesi ishte një mesazh i guximshëm i thënë nga një ministre kulture”, iu drejtua moderatorja Ori Nebiaj.
“Edhe si ministre apo përkthyese, unë flas pareshtur për librin dhe është e vështirë të tërhiqet vëmendje nëse nuk kemi të bëjmë me një reklamë, apo diçka tjetër, por nuk ishte i qëllimshëm. Lexova një artikull të Ëaters, i cili tentoi të provokojë shoqërinë me këtë ide, pra në marrëdhënien në çift, pasi libri mund të jetë kriter i tjetrit. Për çdo gjë që bëni mendoni edhe kriterin e përzgjedhjes kulturore, pra a ka ky njeri një kulturë pas”,tha Kumbaro.
“Don’t f*ck them”, zonja Kumbaro jemi të gjithë të rritur”, tha Nebiaj, ndërsa ministra i përgjigjet:
“Po më habisni pak me cektësinë e interpretimit tuaj. Waters shpreh një mesazh, se një njëri i rrethuar me libra është një njeri më i mirë. Nëse lexoni më shumë ju bëheni një gazetare më e mirë, një shoqe më e mirë. Ky është edhe mesazhi që ju duhet të jepni në media”, tha ministrja.
