Aleanca LGBT dhe ProLGBT, kanë nxjerr një spot ku tregohet një familje shqiptarësh që janë një çift lezbikesh bashkë me fëmijën e tyre.
Këto dy organizata kryesore për të drejtat e komunitetit LGBT në Shqipëri kanë prodhuar këtë spot në kuadër të Ditës Ndërkombëtare për Familjen (15 maj) dhe në kuadër të Ditës Ndërkombëtare Kundër Homofobisë (17 maj).
Spoti tregon jetën e lumtur të përditshme të kësaj failje dhe mbyllet me mesazhin “Familja është dashuri dhe përkujdesje”. Me anë të këtij spoti ngrihet dhe një çështje themelore për të drejtat e komunitetit LGBT në Shqipëri, siç është e drejta për njohjen ligjore mes partnerëve të të njëjtit seks.
“Në Shqipëri çiftet gej dhe lezbike janë realitet. Këto çifte ndërtojnë çdo ditë me përkushtim dhe sakrifica të jashtëzakonshme jetët e tyre dhe është e padrejtë që në këtë vend disa familje të kenë të drejta të plota, e disa të tjera të mos gëzojnë asnjë të drejtë”, tha Xheni Karaj, aktiviste për të drejtat e LGBT.
“Ka ardhur koha që Parlamenti i Shqipërisë dhe politika shqiptare të marrin përgjegjësitë dhe të ngrihen mbi paragjykimet, në mënyrë që sa më parë të amendohet Kodi i Familjes për të mundësuar edhe për komunitetin LGBT të gjitha të drejtat që gëzojnë qytetarët e këtij vendi. Nuk mund të ketë disa qytetarë të dorës së parë e disa të tjerë të dorës së dytë”, tha Kristi Pinderi, aktivist.
