Kreu i Partisë Demokratike të Leskovikut, Fatmir Gruda, ka denoncuar grabitjen më të madhe që po i bëhet zonës së Kolonjës dhe pasurive natyrore në Leskovik, nga Rilindasit.
Gruda shkruan se zyrtarët e lartë të Rilindjes pasi varfëruan Leskovikun larguan njerëz nga puna, tashmë po bëjnë ç’të munden që të grabisin dhe përvetësojnë pasuritë natyrore dhe ato mjedisore të zonës.
Ja çfarë shkruan Gruda:
Harresa dhe përbuzja do të ishte më e pakta që pushteti i “rilindjes” do t’i rezervonte Leskovikut dhe Kolonjës. Sepse përveç papunësisë dhe varfërisë të ulur këmbëkryq aty, një babëzi e pashterur po spikat tanimë në plan të parë, teksa konstaton me keqardhje që një grusht njezish të lidhur me pushtetin, sapo kanë nisur një etapë të re, atë gllabërimit dhe të degjenerimit total të një prej krahinave më me vlerë kombëtare, historike dhe turistike duke arritur deri aty sa të vënë dorë mbi mjedisin e papërsëritshëm dhe rrezikuar seriozisht resurset e mbetura në atë zonë.
Të gjithë qytetarët aty ndihen të shqetësuar dhe të pafuqishëm ndërsa shprehin indinjatë për shkatërrimin që po përgatitet t’i bëhet një territori të gjelbër në sipërfaqe të konsiderueshme me hapjen dhe shfrytëzimin e karierave për nxjerrje mermeri, pikërisht mu në një nga masivet e rralla pyjore të vëndit, atë të zonës Gërmënj – Shelegur të shpallur edhe Park Kombëtar. Por në vënd që në këtë zonë pyjore të krahinës së Leskovikut të duartrokiten dhe inkurajohen nismat për ngritje fermash bletorale dhe resortesh turistike që për fat të mirë dhe nuk kanë munguar të ngrihen me shumë guxim e jo pak risk për shkak të infsratrukturës rrugore të munguar, papritur vjen si thikë pas shpine dhe kjo tentativë korruptive për tua dëmtuar dhe ato vlera natyrore që shihen si shpresa e vetme për të mbajtur gjallë vlerat turistike dhe zhvillimin e kësaj krahine. Sipas banorëve, kjo është pabesia e rradhës që qeveria e “rilindjes” po u rezervon pas zhdukjes së Leskovikut nga harta e bashkive, një prej qyteteve me histori, kulturë dhe me tradita të hershme kombëtare, ç’ka u shoqërua dhe me braktisjet masive nga njerzit çdo ditë të kësaj zone. Dhe vënia dorë mbi mjedisin duke dëmtuar bukurinë natyrore që ofron masivi pyjor aty, i vuri kapak mungesës së dashamirësisë së qeverisë për këtë krahinë dhe mallkim më i madh për juglindjen e izoluar dhe të prapambetur nuk mund të bëhej.
Megjithse të sfilitur nga hallet e përditshme dhe pamundësitë e përballimit të jetës së vështirë, leskoviqarët kurrsesi nuk bien dakort ta lejojnë, që natyra e virgjër e zonës së tyre të bjerrë preh e orekseve të njerzve të pandjeshëm që vijnë me kapadaillëk në emër të pushtetit duke bërë fakt të kryer marrjen e lejës së shfrytësimit nga ministria e energjitikës. Dhe dihet se kush janë të zotët e pushtetit në këto anë, që i shkelin syrin prologut të kësaj masakre mjedisore. Niko Peleshi dhe Elisa Spiropali, të cilët të zgjedhur prej pushtetit pa asnjë lidhje me atë zonë i kanë hedhur në kosh fjalët e mira dhe superlativat maramendëse të thëna përmëndësh nëpër fushata votimesh për mjedisin, natyrën e virgjër të Leskovikut e Kolonjës dhe njerëzit e mrekullueshëm të asaj treve dhe si dy jabanxhinj të këqij larg çdo detyrimi ligjor dhe përgjegjshmërie qytetare po i gatisin të zezën e rradhës.
E çuditshme se ndërsa nga njëra anë dëgjon të flitet për aksione të qeverisë në mbylljen e të tilla masakarave mjedisore të përhapura pa kriter në gjithë territorin e vëndit dhe nga ana tjetër valon noterizimi i kontratave të reja në zona ku pretendohet se mungon sensibiliteti dhe vëmëndja e duhur qytetare, sigurisht që mbrojtja e territorit sidomos atij të gjelbërt mesa duket më shumë sesa propogandë është një zhurmë e rëndomtë qeveritare, pas së cilës po tentohet të mbulohet shfrytëzimi abuziv me konçensione korruptive që po u vret leskoviqarëve si gjithë shqiptarëve shpresën e të ardhmes për të jetuar pa u rënë kush në qafë dhe pa i rënë në qafë kujt.
