Malvina ishte duke ngjitur shkallët e institucionit ku punonte kur disa kolegë e njoftuan beftas se ajo ishte pushuar nga puna! Pa asnjë paralajmërim, pa asnjë motiv, punonjësja e Drejtorisë së Tatimeve Malvina Palushi, ekonomiste me profesion dhe me një përvojë 6 vjeçare, merr një shkresë në 28 prill 2018 për largimin nga puna si inspektore në Drejtorisë së hetimit tatimor, edhe pse në vlerësimet vjetore ishin shumë të mira.
Çfarë kishte ndodhur? Kush ishin arsyet?
Eprorët e saj heshtin, ulin kokën dhe nën zë thonë se Malvina Palushi kishte qenë në zgjedhjet e fundit parlamentare në listën e kandidatëve të Lëvizjes Socialiste për Integrim (LSI), një parti opozitare me partinë qeverisëse socialiste. Aktivizmi politik jashtë orarit të punës ishte diçka publike, që znj. Palushi, edhe po të donte nuk mund ta fshinte. Pjesëmarrja e saj në aktivitete politike lajmërohet në disa raste dhe kjo nuk ishte problem për eprorët e saj, deri në datën 25 qershor. Prej ditës pas zgjedhore do të fillonte edhe kalvari i znj. Palushi, së cilës në fillim e ulin në detyrë dhe e trysnojnë në disa forma. Më 9 janar të vitit 2018 ajo ulet në detyrë nga pozicioni Përgjegjëse Zyrës Monitorimit në Inspektore Hetimi në Drejtorinë e Tatimeve pa asnjë verejtje, paralajmërim dhe pa dijeninë e saj.
Është e qartë se ulja në detyrë si dhe largimi nga kjo detyra është bërë vetem për shkak të bindjeve të saj politike. Kjo përkon dhe me periudhën kohore kur LSI del në opozitë pas zgjedhjeve të 25 qershorit 2017. Ajo kritikohet se ka foto në rrjetet sociale që shfaqin bindje politike.
Hetimi për antidiskriminim
Malvina Palushi është një vajzë e zgjuar dhe e determinuar për të reaguar fort kundër padrejtësive. Znj. Palushi është ankuar zyrtarisht pranë Komisionierit për Mbrojtjen nga Diskriminimi, autoritet i pavarur vendas për të luftuar diskriminimin dhe promovuar barazinë, i cili pranon ankesën e saj dhe ka filluar një hetim të thellë për institucionin e Drejtorisë së Tatimeve – Drejtorinë e Hetimit tatimor për diskriminim politike ndaj një punonjëse të saj, e cila është larguar nga puna, pavarësisht se është me kualifikime konform ligjit dhe çdo vit ka pasur vlerësime në punë. Inspektorët e zyrës së Komisionerit për mbrojtjen nga Diskriminimi, kanë administruar të gjitha dosjen e punës së institucionit për të parë edhe raste të tjera të diskriminimit. Vendimi mbi çështjen e Malvina Palushit pritet të dalë brenda 90 ditëve, në konform të proçedurave.
Pushimet e padrejta nga puna
Punonjësit në administratën publike shqiptare pushohen shpesh nga puna për arsye të paqena, kryesisht për të liruar vende pune që më pas mbushen me mbështetës të ministrit apo drejtorit të rradhës. Përgjatë 5 viteve të fundit, punësimet për arsye politike janë një sekret i njohur nga të gjithë. Dhe një fakt i pranuar nga të gjithë është gjithashtu që punonjësit e pushuar nga puna i drejtohen gjykatave, të cilat, në shumicën dërrmuese të rasteve, i japin të drejtë dhe akordojnë kompensim financiar, i cili, në fund, paguhet nga taksapaguesit. Moria e vendimeve të gjykatave për pushime të paligjshme nga puna në administratën publike i kanë kushtuar taksapaguesve shqiptarë miliona euro. Sipas të dhënave të disponueshme nga media jonë gjatë vitit 2015, kostoja e përgjithshme e faturave të shlyera për pushimet e padrejta nga puna arriti në 3.1 miliardë lekë, (rreth 22.3 milionë euro), ku pothuajse të gjitha institucionet kryesore në vend qenë përgjegjës për këtë dëm. Buxheti i shtetit shlyen çdo vit në Shqipëri mijëra fatura detyrimesh të krijuara nga vendimet e gjykatave, të cilat shpallën si të paligjshme pushimet nga puna të një numri të lartë punonjësish të të gjitha niveleve të administratës publike.
Një numër institucionesh më herët këtë muaj janë pyetur mbi numrin e punonjësve të hequr nga puna dhe mbi shkaqet e heqjes nga puna. Përgjigjet që institucionet dhanë sugjerojnë se asnjëra prej tyre nuk është e gatshme të analizojë situatën dhe të mbajë përgjegjësi. Departamenti i Administratës Publike, i cili është përgjegjës vetëm për atë pjesë të administratës publike që përbëhet nga punonjës me statusin e nëpunësit civil, gjithashtu nuk ofroi statistika konkrete mbi numrin e çështjeve në procese gjyqësore për pushime të padrejta nga puna. Asnjë nga institucionet nuk duket se ka procedura për të mbajtur përgjegjës personat që kanë kryer pushimet e padrejta nga puna dhe që kanë shkaktuar koston e stërmadhe për taksapaguesit. Në fakt, sugjerohet se pushimi nga puna dhe marrja e dëmshpërblimit nëpër gjykata është një procedurë e zakontë.
