NGA ZEF PREÇI*
Të nderuar gazetare të shtypit të shkruar dhe medias audio-vizuale!
Duke vlerësuar lart misionin dhe rolin tuaj
– në një mjedis aspak të favorshëm për lirinë e medias,
– në një vend ku pushteti sjell para dhe paratë e grabitura buxhetit të ngjitin në majat më të larta të pushtetit,
– ku është përherë e më e vështirë të bësh dallimin midis atij që shkel ligjin dhe atij që paguhet me taksat e qytetarëve për të ruajtur të parin,
– ku është gati-gati e pamundur për të dalluar fjalët e politikanëve nga veprat (e munguara) të tyre që shfaqen vetëm në fushatën zgjedhore dhe mandej në mas-media,
– ku qytetarët si dele (jo si dele-gatë) votojnë listën e kryetarit pa ditur se çfarë pasanikësh pa tru të pasuruar nga pushteti e banditësh me emra të ndërruar e të dënuar apo të kërkuar nga drejtësia perëndimore ka kjo listë,
– ku propaganda e ngritur në sistem zhurmon dhe mbyt zërat kritike dhe “era e lirisë” fryn vetëm në Fabebook e rrjetet e tjera sociale,
– ku ligjet bëhen vetëm për sytë e të huajve dhe jo për të mirën e qytetarëve të vendit,
– ku fjalët “punësim e mirëqenie” po dalin nga fjalori i përditshëm dhe janë zëvendësuar me fjalën “reforma” të cilat mungojnë,
– ku pronën e gëzon ai që është “më i fortë” dhe që ka padyshim mbështetjen e politikës/shtetit,
– ku investitorët perëndimorë e shohin vendin si të fundit të mundshëm për të investuar paratë e tyre,
– ku anglezët në dilemën e tyre të madhe “to be or not to be (EU member)” gjejnë rastin të bëjnë humorin e tyre të hollë,
ku “rregulli i e djeshëm” gati ndrin në krahasim me amullinë e të sotmes,
– ku “largimi/ikja” është kryefjala që shqipton i riu apo e reja sapo fillon të kuptojë botën përreth,
– ku shpresa venitet si në një “tokë të braktisur” (no men’s land),
– ku fjala “shtet” barazohet “pushtet”
Kam kënaqësinë të ndaj me ju shpresën për reformën në drejtësi që ndoshta fillon dhe në harkun e viteve të dekadës së ardhshme, lista e mësipërme do të fillojë të zvogëlohet dhe në vend do të bjerë “era shtet” dhe jo “vetëm erë…” E duke qenë se kjo është një rreze shprese siç është një qiri në një natë të ftohtë dimri me erë e stuhi, këto dite filloi edhe “dekriminalizimi”, një nismë që pakkush e beson, se largimi i kontingjenteve të krimit nga rreshtat e parë të përfaqësimit më të lartë politik dhe institucional do të zvogëlojë influencën e tyre në tenderë, në emërime, në kultivim e tregtim droge, grabitjen “me ligj” e copave të Shqipërisë përmes koncesioneve e të tjera si këto…
Meqë jemi te kjo temë, e meqë mbrëmë u mësua se një drejtues lavatriçeje për pastrim parash siç është sporti në “vendin e shqipeve” rrahu barbarisht një gazetar për shkak të detyrës (histori që ka ndodhur edhe më parë në raste të ngjashme) ju sugjeroj juve e përmes jush atyre që pretendojnë se përfaqësojnë qytetarët, (në fakt përfaqësojnë kryetarët e partive) të amendojnë ligjin për dekriminalizimin duke zgjeruar objektin e këtij ligji për të përfshirë edhe drejtuesit e klubeve sportive.
Kjo mbasi sporti, një lloj si arsimi dhe dija është një e mirë publike kudo në botën e qytetëruar dhe jo një ndërmarrje kriminale, që pjell para kriminale dhe në disa raste edhe ngjarje të dhimbshme kriminale si kjo e djeshmja.
Me këtë rast, e ftoj median të shprehë solidaritetin e vet me kolegun e dëmtuar për shkak të detyrës dhe të gjithë duhet të falënderojmë policinë që hodhi hapin e parë për ndëshkimin ligjor të dhunuesit të veshur me pushtet në lëmin e sportit. Ecuria e procesit duhet ndjekur në vijimësi…Kaq, më e pakta që mund të bëhet…
*Zef Preci, ekspert i njohur ekonomie
