Frika nga trazirat ka shtyrë klubin anglez të Liverpool që të mos grumbullojë yllin zvicerian, Xherdan Shaqirin në transfertën serbe ndaj Crvena Zvezda.
Lajmin e ka bërë të ditur vetë trajneri Jurgen Kloop, i cili tha se nuk duan të shkaktojnë incidente për shkak të origjinës shqiptare të Shaqirit.
“Kemi degjuar shumë spekullime për këtë temë. Ne nuk e dimë se çfarë mund të ndodhë atje. Ajo është një ndeshje e rëndësishme dhe duam të fokusohemi 100 për qind në fushën e lojës, dhe jo të mendojmë gjëra të tjera. Prandaj menduam që Shaqiri të mos udhëtoje me ne. Ai është një lojtar fantastik, dhe klubi e dashuron atë. Por situata është e tillë”, tha Kloop.
Pak kohë më parë drejtori sportiv i Crvena Zvezdas, Zvezdan Terziç, zbuloi se klubi i tij do të bëjë detyrën për të mbrojtur Shaqirin, së bashku me Liverpoolin, megjithëse theksoi ndikimin e situatës.
“Unë mendoj se Shaqiri do t’i nënshtrohet presionit të jashtëzakonshëm psikologjik,”-tha Terziç për gazetën serbe “Kurir”.
“Ai e di se ku do të shkojë. E di mirë se klubi ynë është një simbol i Serbisë. Nuk e di nëse ai do të jetë i gatshëm të luajë në Serbi, në këto kushte, kështu që dyshoj se do të vijë. Ne duhet të bëjmë gjithçka që mundemi që Shaqiri të ndihet i sigurt për të luajtur futboll”, tha ai.
Ndeshja e vlefshme për fazën e grupeve të Champions League është programuar për tu zhvilluar nesër, duke nisur nga ora 18:55.
