Është ngritur komisioni i pavarur për koordinimin, monitorimin dhe ndjekjen e zbatimit të ligjit për organet e qeverisjes të sistemit të drejtësisë. Kryetari i Kuvendit, Gramoz Ruçi tha se ngritja e këtij komisioni është i vonuar, pasi është pritur edhe opozita, por duke qenë se ajo nuk po bëhet pjesë e jetës parlamentare tha Ruçi, “nuk mund ta prisnim më“.
Gramoz Ruçi: Në kuadër të kësaj reforme Kuvendi miratoi ndryshime të rëndësishme kushtetuese dhe njëherësh dhe një paketë ligjesh organike që rregullojnë organizimin dhe funksionimin e organeve të sistemit të drejtësisë. Sigurisht disa organe janë të reja, disa ekzistuese do të kenë një organizim të ndryshëm nga ai i deritanishëm bazuar në standardet më të mira europiane.
Ligji 115 i vitit 2016 për organet e qeverisjes të sistemit të drejtësisë parashikon ngritjen e një organi monitorues, komisioni i pavarur për koordinimin, monitorimin, ndjekjen dhe zbatimin e ligjit, anëtarë të të cilit janë dy zonjat dhe tre zotërinj.
Ky komisioni duhet të ishte ngritur më parë. Përpjekja e parë u bë menjëherë pasi Gjykata Kushtetuese dhe vendimi lidhur me kërkesat e paraqitura nga opozita dhe shoqata e gjyqtarëve, për disa nene të ligjit 115 të vitit 2016 për shkak të bojkotit të opozitës dhe më pas të shpërndarjes së parlamentit për shkak të zgjedhjeve parlamentare, ky komision nuk u ngrit në kohën e duhur.
Me fillimin e legjistraturës së re, Kuvendi priti kthimin e opozitës në jetën parlamentare normale, por për aq kohë sa opozita vazhdon qëndrimin e saj jashtë kuvendit, sigurisht që kuvendi nuk mund të presë dot më tej.
Prandaj në zbatim të këtij detyrimi ligjor, Kuvendi miratoi vendimin nr 74 2018 për ngritjen e komisionit të pavarur për koordinimin, monitorimin dhe ndjekjen e zbatimit të ligjit për organet e qeverisjes të sistemit të drejtësisë.
