Policia ka arrestuar sot, presidentin e ekipit të Kastriotit, i cili akuzohet për plagosjen e gazetarit Eduard Ilnica. Ndërkaq policia jep edhe detaje nga ngjarja.
Sipas hetimve ngjarja e rëndë ka ndodhur mbrëmë rreth orës 22:20, në rrugën “Muhamet Gjollesha”, në afërsi të bar “Noel”, ku është goditur me sende të forta shtetasi Eduard Ilnica, 41 vjeç banues në Tiranë, i cili ndodhet në S.Q.U., jashtë rrezikut për jetën.
Grupi hetimor në vendin e ngjarjes ka bërë të mundur identifikimin dhe më pas kapjen e autorit të kësaj vepre penale, shtetasit Alban Vogli, 29 vjeç, banues në Krujë, presidenti i ekpit të “Kastriotit”
Vogli, sipas bluve ka tentuar të marrë me forcë në mjetin e tij tip “Volkswagen”, me targë AA229LB, gazetarin Ilnica, ku më pas e ka dhunuar duke e goditur me sende të forta, për arsye të një artikulli që ai ka publikuar në një gazetë lokale.
Materialet proceduriale i kaluan Prokurorisë Pranë Gjykatës Shkallës së Parë Tiranë, për veprat penale “Plagosja e rëndë me dashje”, “Heqja e paligjshme e lirisë” dhe “Goditjet për shkak të detyrës”.
