Pas humbjes dje 3-0 në derbin e Xhenovës skuadra e Sampdorias ka siguruar qëndrimin në Serinë A, por situata në klubin blukaltër nuk është aspak e mirë. Mediat italiane raportojnë sot se disa incidente kanë ndodhur pas ndeshjes, ku janë përfshirë lojtarët dhe trajneri, që kanë patur polemika me drejtuesit e klubit. Përplasja e parë ndodhi në një emision televiziv, ku drejtori sportiv Carlo Osti ka kritikuar skuadrën për lojën e dobët në fushë. Në transmetim direkt ka qenë edhe trajneri Vincenzo Montella, që ka debatuar me “shefin” e tij dhe ka mbrojtur skuadrën.
Ky incident duket se është hapi i parë i një divorci mes trajnerit dhe skuadrës. Montella mendohet se është një nga kandidatët kryesorë për stolin e kombëtares italiane, ndërkohë që erdhi nëntorin e kaluar te Sampdoria, kur zëvendësoi Walter Zenga. Madje është përfolur se pas ndeshjes Montella ka dashur të dorëzojë dorëheqjen edhe pse ka ende edhe një vit kontratë, por kjo nuk kishte sens kur ka ende edhe një javë kampionat. Ky sezon i Sampdorias ka qenë një zhgënjim, teksa vetëm dje siguroi mbijetesën në Serinë A.
Antonio Cassano, sulmuesi i Sampdorias Por sot është zbuluar se edhe sulmuesi Antonio Cassano ka patur përplasje me avokatin Antonio Romei, krahun e djathtë të presidentit Massimo Ferrero. Romei ka hyrë në dhomat e zhveshjes pas derbit dhe ka kritikuar skuadrën për lojën, por sulmuesi ka mbrojtur lojtarët, duke debatuar me avokatin. Kjo ka sjellë një përplasje edhe pse në një komunikim për mediat, klubi i Sampdorias ka mohuar gjithçka dhe sot Cassano do të jetë normalisht në fushë në stërvitje. Në kontratën që Cassano ka me Sampin ka një klauzolë, që zgjidh në mënyrë të menjëhershme kontratën në rast të një sjellje jo të mirë.
