Artur Metani është emëruar nga kryeministri Edi Rama, si Avokati i ri i Shtetit, pas dorëheqjes së Alma Hickës.
Metani është vëllai i ish-ministres të Zhvillimit Urban dhe deputetes socialiste, Eglantina Gjermeni.
Nga shkurti i vitit 1999 deri në mars 2002, Metani ka punuar si koordinator ligjor pranë “Fondacionit të Shoqërisë së Hapur”, të George Soros-it në Shqipëri.
Po ashtu ai ka punuar si këshilltar i Presidentit Alfred Moisiu në vitet 2001-2012, më pas i Bamir Topit për drejtësinë.
Ndërsa sëfundmi është bërë këshilltar i kryeministrit Edi Rama. Ai ka mbajtur postin e Drejtorit të Departamentit të Legjislacionit dhe Anti-Korrupsionit në Kryeministri.
Metani u emërua nga Rama si Avokat i Shtetit, me propozim të ministres së Drejtësisë Etilda Gjonaj.
Rama, reagoi më herët për largimin e avokates Alma Hicka duke thënë se nuk është e vërtetë që e ka shkarkuar, por që ajo u largua për arsye personale.
„Kazanët po ziejnë një broçkull për “shkarkimin” e Alma Hickës. Në fakt Alma u largua me dëshirën e saj, për arsye krejt personale e për gjithë keqardhjen time që e konsideroj një Avokate të shkëlqyer të Shtetit. Me neveri për kazanët i them Almës mos u mërzit e paç vetëm sukses“, janë fjalët e Ramës.
Avokatin e ri të Shtetit, kryeministri nuk e përmendi në reagimin e tij.
