Ish-ministri i Brendshëm, Saimir Tahiri ka publikuar vendimin e gjykatës italiane se në vendin fqinj janë mbyllur hetimet me vendim të formës së prerë.
Në një dalje për mediat, Tahiri e ka nisur me ndjesë ndaj gazetarëve, fillimisht për zërin e ngjirur e më pas për kushtet e motit me shi, pasi konferenca para gazetarëve po zhvillohet në ambient të hapur. “Ndjesë për zërin tim, ndjesë edhe për shiun”, e nis fjalën Tahiri, i cili më pas tregoi pse ka heshtur për një vit, pas akuzave se ishte i përfshirë në trafikun e lëndëve narkotike në bashkëpunim me bandën e Habilajve.
“Më 24 tetor 2017 deklarova në media se ndaj meje s’kishte asnjë hetim. Atëherë ajo dora e zezë lëvizi fort për të thënë se letrat ishin të falsifikuara.
Prokuroria antimafias italiane regjistroi një hetim ndaj meje tre ditë më pas. Ky institucion i kërkoi gjykatës italiane pushimin e hetimeve për Tahirin se nuk është i përfshirë në aktivitet të paligjshme. Sot kam vendimin e gjykatës. Jam i pafajshëm”, u shpreh Tahiri.
